Hongkong het Japan Saterdag ʼn groot skrik op die lyf geja in hul kragmeting in Tokio in die Asiatiese Rugbykampioenskap.
Japan het wel uiteindelik met 29-17 op die Prins Tjitjiboe-gedenkveld gewen, maar die Dapper Bloeisels was 20 minute voor die einde nog met 12-17 agter.
Die tuisspan het aanvanklik gesukkel teen die Hongkongers se fisieke aanslag en ongewoon baie foute begaan.
Hongkong se Waliese afrigter, Leigh Jones, het ná die wedstryd aan Kyodo News gesê hy dink hy het sy bank verkeerd aangewend, en só die skaars kans op ʼn sege oor Japan deur sy vingers laat glip.
Jones het as verdedigingsafrigter van Japan gehelp om die Springbokke se ondergang teen die Bloeisels by 2015 se Wêreldbekertoernooi te bewerkstellig.
Hongkong het hom in Maart verlede jaar aan die hoof van sy beroepsprogram aangestel, en het onder sy leiding reeds merkwaardig gevorder.
