Malcolm Marx – loop dalk die hele Engelandreeks mis. (Foto: Twitter)
Die Lions se haker en ook die ongetwyfelde eerste keuse vir die Springbokspan, Malcolm Marx, sal as alles goed gaan waarskynlik net in die derde toets teen Engeland kan speel.
Die Leeus Rugby-Maatskappy het Woensdagoggend in ʼn mediaverklaring aangekondig dat Marx ʼn ”hoëgraadskeur” in ʼn dyspiertendon opgedoen het. Hy is verlede Saterdag ná net ʼn paar minute van die wedstryd teen die Hurricanes in Wellington vervang.
Hoewel ʼn operasie nie nodig is nie, sal dit vir Marx na verwagting “minstens ses weke” neem om te herstel, luidens die Lions-verklaring.
Dit beteken dat Marx, as alles goed gaan, eers weer op 20 Junie reg sal wees as aanvaar word sy ses weke begin van nou af.
Die toetse is op 2 Junie teen Wallis en dan op 9, 16 en 23 Junie teen Engeland.
♦ Dit is te betwyfel dat daar selfs in die derde toets teen Engeland met Marx gewaag sal word. ʼn Dyspier is ʼn moeilike besering waar die terugkeer na aktiewe sport gewoonlik baie versigtig benader word.
Strauss speel nou weer uitstekende rugby. As plaasvervanger kan Rassie gerus na hom kyk.
Los hom eerder dat hy ten volle herstel. Hierdie Junie toetse is buitendien nie sterkte teen sterkte nie. Heelwat sterk spelers word gerus en ander kans gegee.
Maak seker dat hy reg is vir die Rugby Championship teen NZ