Spring Rose en Gardens het seker gemaak dat twee spanne van die Oostelike Provinsie Saterdag op Despatch die eindstryd van die Oos-Kaapse Super12-reeks betwis.
Rose het `n puik vertoning gelewer om die verdedigende kampioen, Oos-Londen Polisie van die Grens, se aanspraak op vanjaar se titel in die kiem te smoor. Hy het 31-12 gewen en getoon dat hy `n wesenlike bedreiging vir Gardens in die eindstryd sal wees.
Sake het tot rustyd heel gelykop verloop met Rose wat teen blaastyd 14-12 voor was. Die OP-span het sy spelpeil in die tweede helfte gelig en op die ou end maklik gewen.
Die wedstryd op Rosedale was veel mededingender, met Gardens wat Progress net-net 13-12 geklop het om die eindstryd die derde opeenvolgende jaar te haal.
Ná `n rustydtelling van 5-5 het Gardens die botoon in die tweede helfte gevoer, met Progress wat `n klompie strafskoppe afgestaan het wat hulle uiteindelik naelskraap die wedstryd teen verlede jaar se naaswenner gekos het.
♦Die eindstryd is Saterdag 15:30 op Despatch se WJ de Wet-stadion. Progress en Polisie speel 13:30 om die derde en vierde plek uit.
(Berig deur die OPRU verskaf.)