Die Blitsbokke het met die louere in Vancouver weggestap. Foto: Twitter.
Die Blitsbokke het vir die tweede keer in die geskiedenis die Kanada-sewestoernooi gewen toe hulle Kenia met 38 – 5 in die bekereindstryd geklop het.
Die Suid-Afrikaners het ses drieë in die kragmeting gedruk, terwyl ’n vlieënde Angelo Davids sommer in die proses ook die rekord vir die meeste drieë deur ’n individuele speler in Vancouver verbeter het.
Die 22-jarige Kapenaar het tien keer deur sy teenstanders se verdediging geglip om punte vir sy span aan te teken.
Ja, groot spanne soos Nieu-Seeland en Fidji was weliswaar afwesig in Vancouver, maar ná die teleurstelling van die Olimpiese Spele – waar die span met ’n vyfde plek tevrede moes wees – is dit goed om weer op die wenpad te wees.
“Dit is ongelooflik om net weer rugby te speel en boonop ook nog voor entoesiastiese toeskouers. Ek is baie trots op die span; daar was baie jong spelers wat die toekoms van sewesrugby in Suid-Afrika is en hulle het hulself goed van hul taak gekwyt,” het Neil Powell (afrigter) gesê.
Shakes Soyizwapi se span het elke uitspeelwedstryd op ’n drafstap gewen en hulle het 119 punte in dié kragmetings aangeteken en slegs 22 afgestaan.
Die Blitsbokke het nou 20 punte op die HSBC-sewespunteleer.
- Vancouver-uitslae:
53 – 0 teen Mexiko
34 – 7 teen Spanje
33 – 14 teen Kenia
54 – 5 teen Spanje (kwarteindstryd)
26 – 12 teen Groot-Brittanje (halfeindstryd)
38 – 5 teen Kenia (eindstryd).
A brilliant performance saw @blitzboks talent, Ronald Brown named as Player of the Final! @DHLRugby pic.twitter.com/RenZiuBzbx
— World Rugby Sevens (@WorldRugby7s) September 20, 2021
Baie geluk!!
bietjie van n hol oorwinning, sonder NZ en Fidji. so laat die vreugde vure maar eers net so n paar droee blare wees