Rassie het sy huiswerk behoorlik gedoen

Rassie Erasmus. Foto: (Kyodo News via AP)

Haarfyn beplanning is al jare lank een van Rassie Erasmus se grootste bates.

Jare gelede, toe hy nog vir die Vrystaat gespeel en afgerig het, was hy gereeld in die nuus oor sy unieke en onkonvensionele metodes.

Dink maar aan die wys van kleurkaarte en later diskoligte op die dak van die Vrystaatse stadion se hoofpaviljoen, waarmee hy met die spelers gekommunikeer en boodskappe oorgedra het. Dink maar aan hoe hy met sy teenstanders se koppe gesmokkel het, dat van hulle geweier het om met rustyd kleedkamer toe te gaan, ingeval daar meeluisterapparate was.

In 2005 het hy vyf stutte in die Curriebekereindstryd teen die Blou Bulle gekies: Os du Randt, CJ van der Linde, Ollie le Roux, Jannie du Plessis en Wian du Preez, wat almal die een of ander tyd vir die Springbokke gespeel het.

Hy het hulle in die eindstryd vervang en later weer opgestuur. Daar is agterna daaroor gekla, daar is gesê dat dit teen die reëls was en indruis met die gees van die spel. Wat wel saak gemaak het, is dat dit die Blou Bulle heeltemal onkant betrap het. Die Vrystaat het met 29-25 gewen en kon die eerste keer sedert 1976 weer die Curriebeker omhoog hou.

Rassie Erasmus. Foto: (AP Photo/Themba Hadebe)

Erasmus is ʼn groot denker en ontleder van die spel. Hy en sy ondersteuningspan ontleed elke span, elke speler en elke denkbare aspek van die spel om ʼn moontlike voorsprong te kry. Hy het die klaarblyklike meesterplan om die All Blacks te ontspoor. Dit behels onder meer om hulle met opskietverdediging op die agtervoet onder druk te plaas, hulle agter die voordeellyn te wurg, om hulle in foute te dwing.

In verlede Vrydag se opwarmwedstryd teen Japan het die Japanners 64% besit gehad, maar hulle kon net sewe punte aanteken.

Hulle het in die hitte en humiditeit baie meer foute begaan en dis presies wat Erasmus-hulle wou hê.  Dit was ʼn nuwe manier om besit te bekom en die bal dan weer terug in hul gebied te kry.

Die Bokke het ook ʼn klaarblyklik vroeë voorsprong bo al die ander spanne, want hulle is reeds sowat twee weke in Japan om vlugflouheid af te skud, ten einde heeltemal by die hitte, humiditeit en vreemde kultuur aan te pas.

Die Iere het eers Woensdag na Japan vertrek, Wallis ʼn dag vroeër, die All Blacks Sondag en die Wallabies Maandag. Gaan dit genoeg tyd wees om behoorlik voor te berei? Net die tyd sal leer of Erasmus se beplanning genoeg sal wees om die Webb Ellis-trofee omhoog te hou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
Liza

Ek is absoluut gaande oor Rassie en sy metodes. Hy dink buite die boks en laat nie toe dat ander hom intimideer nie. Go Rassie, maak ons trots! 100% agter ons Bokspan!

Manie

Op ‘n ander noot. News 24 berig dat Peter de Villiers nie die Springbokke vanjaar by die wêreldbeker sal ondersteun nie, omrede hulle nie vir Etzebeth summier geskors het oor die bewerings wat teen hom gemaak is nie. Die de Villiers ventjie speel alweer die man en nie die bal nie. Ook maar goed die nar is nie meer die afrigter nie.

bloues

Dat Rassie ‘n rugby denker is, is ‘n feit. Oppas net dat slim nie sy baas vang nie.
As jy teen die All Blacks onnodig skop gaan jy probleme optel. Dit is ook ‘n feit

Basjan

Rassie het ‘n meesterbrein wat rugby aanbetref. Ek dink die SPRINGBOKKE het ‘n baie goeie kans om die beker huistoe te bring onder Rassie se leiding.

Erika

Wat ‘n afrigter en lojale persoon teenoor die Bokke!
‘n Persoon wat net die beste vir sy land wil hê!
Jy maak ons trotse Bok ondersteuners….