Rassie praat oor Japan, Wallis

Rassie Erasmus. Foto: (Kyodo News via AP)

Springbok-afrigter Rassie Erasmus kan vandag ’n tevrede man wees: Die Bokke het vir die halfeindstryd van die Wêreldbeker-rugbytoernooi gekwalifiseer en hulle het die Japanse gevaar goed geneutraliseer.

Maar tog erken hy dat die senuwees lekker in die kwarteindstryd geknaag het – veral toe hulle ’n rustydvoorsprong van net 5-3 gehad het. Dit was die minste punte wat in die 2019-toernooi in die eerste 40 minute van ’n wedstryd aangeteken is.

“Ons is baie tevrede oor die feit dat ons na die halfeindstryd deurgedring het, maar ons was teen rustyd lekker op ons senuwees gewees,” het Erasmus gesê.

“Om eerlik te wees, ons was vanuit die staanspoor nogal op ons senuwees om teen Japan te speel. Die ondersteuning wat hulle geniet, is verstommend en die manier waarop hulle teen Ierland en Skotland gespeel het, het vir hulle baie momentum gegee.”

Teen rustyd was daar ’n paar Springbok-koppe wat in die kleedkamer gehang het, maar Siya Kolisi en Duane Vermeulen se praatjies het die spelers weer gemotiveer.

“As iemand ’n duikslag mis of as daar ’n gebrek aan toewyding is, kan kwaai woorde moontlik help. Maar as ’n speler bloot ’n ongedwonge fout gemaak het, moet mens eerder probeer om sy selfvertroue ’n hupstoot te gee. En dit is presies hoe Siya (Kolisi) en Duane (Vermeulen) dinge teen rustyd benader het.”

Erasmus is ook tevrede oor die feit dat die Bokke se wedstrydplan op die uiteinde ’n sukses was.

“Ek dink nie dit was ’n gebrek aan toewyding wat ons in die eerste helfte gekniehalter het nie. Dit was meer die kwaai druk wat Japan op ons geplaas het. Die intensiteit waarmee hulle ons verdediging getoets het, was ongelooflik.”

Hy voel dat die Bokke se verdediging goed was en dat die voorspelers die grondslag vir die Suid-Afrikaners se sege gelê het.

“Ons het geweet Japan gaan teen ’n hoë tempo speel en het die span op só ’n wyse gekies om hulle in die skrums, afbreekpunte en losgemale te oordonder. In dieselfde asem het ons hulle spoed en individuele Ferrari-blitse in toom probeer hou.”

Die aandag verskuif nou na Sondag se halfeindstryd teen Wallis en hoewel Erasmus in sy voor- en agterspelers glo, wil hy hê hulle moet vir die volle 80 minute van ’n wedstryd konsentreer.

“Daar was drie of vier minute teen Japan waar ons die konsentrasiebal laat val het. Dus glo ons nie dat ons iets spesifieks – soos skrumwerk of lynstane moet teiken nie – maar eerder om vir die volle 80 minute te speel.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
Onnodig

Ek is nie n rugbykenner nie, maar as die “Speler van die wedstryd”volgende naweek met dieselfde gameplan die balle in die oponente se hande gaan inskop, dink ek kan ons maar koebaai se vir die beker.

JohanR

Weet dit is ‘n ander tyd, ‘n ander veld en ‘n ander dag, maar Wallis het die Springbokke vier keur gewen, in hulle laaste vier ontmoetings. Hoop soe baie dat Sondag nie vyf keer is nie!

Snuffels

Persoonlik dink ek nie die “konsentrasiebal” was laat Val nie… Was eerder weg geskop.

Mel Johannessen

Faf kon net sowel n Japan trui gedra het! As Rassie met Faf gaan “stick” gaan ons nog vier jaar moet wag vir n kans om die WB te wen. Uit 10 skoppe het Faf AL TIEN KEER die besit vir Japan gegee.

Genieve

Tot die kommentators was teleurgsteld in Faf se skoppe as dit so sal gaan Sondag is dit tiekets met ons.