Die grofgeskut brand Saterdag in Groenkloof los wanneer twee van Gauteng se sterkste spanne mekaar op die Harlequinterrein in ʼn vriendskaplike wedstryd voor die bors vat.
Quins-Bobbies-rugby (QBR), die naaswenner in die Noorderbonde se afgelope Assupolreeks, en Brakpan, die Valkekampioen en ʼn semifinalis in verlede jaar se internasionale Goue Bekerreeks (GB), behoort vir ʼn goeie skouspel te sorg.
Pretoria Polisie, wat saam met Quins gesmelt het, om QBR te vorm, het in die GB-halfeindronde teen Valsbaai, die uiteindelike naaswenner verloor.
Die klubs se tweede en o.21-spanne meet eweneens kragte, en OBR o.20 speel teen die gerekende Johannesburgse rugbyakademie Eye of the Tiger.
QBR III en QBR Madalas speel onderskeidelik teen Baviaanspoort I en II.
Die program –
Onderste veld
12:00 QBR Groen o.20 teen Eye of the Tiger
13:15 QBR Groen o.21 teen Brakpan o.21
14:45 QBR Rooi teen Brakpan II
16:15 QBR Swart teen Brakpan I
Boonste veld
13:15 QBR Rooi III teen Baviaanspoort I
14:45 QBR Madalas teen Baviaanspoort II