Rugbyster in sop oor uitlatings

Israel Folau. Foto: Facebook.

Die Australiese rugbyster, Israel Folau, se uitlatings op sosiale media het ʼn storm ontketen en kan daartoe lei dat sy kontrak beëindig word.

Die Waratahs-agterspeler het Woensdag die volgende op sy Instagram-rekening geplaas: “Dronkaards, homoseksuele persone, egbrekers, leuenaars, hoereerders, diewe, ateïste en afgodedienaars – Hel wag vir julle.”

Hy het bygevoeg dat hulle hulself moet bekeer en dat net “Jesus kan red”.

Folau se kommentaar is deur Rugby Australië veroordeel en in ’n verklaring het hulle gesê hulle is van plan om sy kontrak te beëindig.

“Rugby Australië en die New South Wales Rugbyunie het sedert Woensdag herhaaldelik met óf Israel óf sy verteenwoordigers in verbinding probeer tree, maar sonder sukses.

“Hoewel Israel geregtig is op sy geloofsoortuigings, is die manier hoe hy dié oortuigings oordra nie in ooreenstemming met die waardes van die sport nie.

“Israel het gefaal in sy verantwoordelikheid as Rugby Australië- en Waratahs-werknemer deur materiaal op sosiale media te deel wat teen mense diskrimineer op grond van hul seksuele oriëntasie.”

Die verklaring gaan voort deur te sê dat hulle herhaaldelik vir Folau gewaarsku het teen sosialemedia-wanbestuur, asook dat onvanpaste kommentaar tot dissiplinêre optrede kan lei.

“In die afwesigheid van versagtende omstandighede is dit ons voorneme om sy kontrak te beëindig.”

Die Waratahs-speler is in die sop ná sy uitlatings op sosiale media. Foto: Facebook.

Die Wallabies se hoofborg, Qantas-lugredery, se hoof- uitvoerende beampte, Alan Joyce, is homoseksueel en het Folau se sosialemedia-inskrywings as “betreurenswaardig” bestempel.

Folau het pas die topdriedrukker in Superrugby-geskiedenis geword. Hy word as een van Australië se gevaarmanne in die komende Wêreldbeker beskou.

Tog eis talle kenners en oudspelers nou sy kop op ’n skinkbord.

Peter FitzSimons – voormalige Aussie-voorspeler – het in die Sydney Morning Herald geskryf “Folau sal en moet gaan”, anders gaan rugby verspot lyk.

Selfs Nieu-Seeland se eerste minister, Jacinda Adern, het tot dié woordestryd toegetree en gesê Folau se opmerkings moet niemand beïnvloed nie.

Intussen is daar ’n vuurwarm debat op sosiale media, met bespiegeling dat Folau hierna in Europa sy rugbyheil gaan soek. Veral Toulon en Sale Sharks is glo van sy gunstelingbestemmings.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

71 Kommentare

jongste oudste gewildste
Annette

Vryheid van spraak, laat my lag. Dis net “vry” solank hy sê wat die mense “wil” hoor. Die oomblik as hy die waarheid praat, is hy die vark in die verhaal.

Papa G

Is hy, of enige iemand anders, verbaas oor die reaksie? Ek is nie. Sulke uitsprake het sulke reaksies tot gevolg. Dis die tye waarin ons lewe. Die NG-kerk weet dit reeds… Oeps, moes dit nie sê nie!

Pieter

Ek stem saam hom. Hy doen sy taak soos verwag word. Hy het alamsl gewaarsku en nou moet hulle luister. Amen aan hom.

Genieve

Bekeer julle van julle verkeerde wee..net Jesus kan jou red ek stem saam met hom as jy nie Jesus ken nie sal jy nie sy uitspraak wat hy hier gee verstaan nie moenie my aanval nie asb dis net my mening.

Gertryda

Niemand mag hul opinie gee nie. Hoekom moet jy altyd saamstem met die meerderheid? Hy sê wat hy glo