`n Vraagteken hang oor die krag van die Sandveldse kampioen, Hoopstad, vanjaar ondanks sy maklike sege Donderdag oor Bultfontein.
Hy het 24-0 gewen, maar die verwagting was dat hy `n groter oorwinning kon behaal.
Hoopstad het sy afrigter van verlede jaar, Swannie Swanepoel, en uitblinkers soos die linkervleuel Christopher Khumalo en losskakel Danie Schoonraad aan Welkom afgestaan, en dit lyk of hy nog werk het om die leemte te vul.
Verlede jaar se naaswenner, Bothaville, wat destyds in `n naelbyt-eindstryd 19-22 verloor het, het Donderdag veel oortuigender 59-0 teen Viljoenskroon gewen.
Die tellings was veel kleiner in die ander wedstryde met Parys wat 19-15 teen Tikwe, Bronville 12-7 teen Welkom III, en Theunissen 11-5 teen Wesselsbron gewen het.