Ben Ryan – vra Superfranchise vir Fidji. (Foto: ur7s)
Sanzaar het Fidji Vrydag genooi om gesprek oor die moontlikheid van `n Superrugby-franchise te voer.
Die liggaam sê in `n mediaverklaring hy het met belangstelling verneem van `n “veldtog” (Sanzaar se aanhalingstekens) wat deur die gewese sewesafrigter van Fidji, Ben Ryan, gelei word om `n Superrugbyspan in Fidji te ontwikkel.
Sanzaar verklaar uitdruklik dat nóg Ryan, nóg enigiemand anders die beheerliggaam oor die voorstel genader het.
Andy Marinos, die hoof- uitvoerende hoof van Sanzaar, sê dit lyk vreemd dat `n veldtog gevoer word, grootliks in die media, wat Sanzaar as eienaar van die reeks regstreeks raak, maar hom totaal in die duister laat.
“Sanzaar sal `n gesprek verwelkom, en is ontvanklik om met [Ryan] of enige van sy geassosieerdes oor die voorgestelde plan te praat as hy besluit om dit met ons te bespreek,” het Marinos in die verklaring gesê.
