Sharks verbrou kanse

Curwin Bosch. (Foto: ANA)

Soos die gesegde lui: “As is verbrande hout”. Maar as die Sharks nie soos hulle oumas geskop het nie, kon hulle die Cardiff Blues geklop het.

Die besoekers het drie skoppers ingespan, maar Ruan Pienaar, Curwin Bosch en Boeta Chamberlain het by tye ewe skeef gekorrel. Dit is dalk die rede waarom kaptein Phepsi Buthelezi verkeerde keuses gemaak het om nie strafskoppe pale toe te skop nie.

Die Sharks het nooit gelyk of hulle die knoop gaan deurhaak nie. Hulle was nooit ver agter op die telbord nie, maar dit het gelyk of die span meer uitsien na die vliegtuigrit huis toe as ʼn oorwinning.

Onthou, hierdie is dieselfde Cardiff‑span wat verlede week 19 – 29 teen die Bulls verloor het nadat die manne van Pretoria hulle in die tweede helfte gestoomroller het. Voorlangs was die Blues hierdie keer net strate beter as in daardie tweede helfte.

Die Sharks se nederlaag van 17 – 23 teen die manne van Wallis beteken net een Suid-Afrikaanse span kon weer wen die naweek. Die Stormers se oorwinning van 24 – 10 oor die Dragons is die enigste ligpunt van die naweek. Die Kaapse span vaar ook die beste op die punteleer. Hulle is in die 9de plek met sewe ligapunte ná vier wedstryde.

Die Lions (6) is in die 12de plek op die punteleer, gevolg deur die Sharks (5) en die Bulls (5) in onderskeidelik die 14de en 15de plekke.

Die voorste drie spanne is almal van Ierland. Ulster het volpunte (20) ná vier oorwinnings. Hulle word gevolg deur Leinster en Munster op 19 punte elk na vier oorwinnings.

Die Suid-Afrikaanse spanne kom nou huis toe en speel dan einde volgende maand op hulle tuisvelde teen Europese teenstanders. Hopelik kan hulle die bordjies verhang en die punteleer klim.

Op 27 November speel die Stormers in Kaapstad teen Zebre (die span heel laaste op die punteleer) en die Sharks pak die Scarlets in Durban. Die wedstryd waarna veral daardie Saterdag uitgesien word, is wanneer die Bulls vir Munster op Loftus pak.

Die Lions speel op 28 November teen Cardiff in Johannesburg.

Puntemakers:

Cardiff Blues – 23 (17)

Drieë: Matthew Morgan, Uilisi Halaholo

Doelskoppe: Rhys Priestland (2)

Strafskoppe: Rhys Priestland (3)

Sharks – 17 (10)

Drieë: Thomas du Toit, Marnus Potgieter

Doelskoppe: Curwin Bosch, Boeta Chamberlain

Strafskop: Boeta Chamberlain.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

5 Kommentare

jongste oudste gewildste
Harley Davidson

Kry die regering met hulle kwotas gebaseer op die kleur van jou vel uit sport en dit sal beter gaan met sa sport,net soos apartheid is hierdie verkeerd en moet gestop word sodat sa weer ‘n krag kan word in die wêreld.

AW

Volgende keer né !!