Ná ’n paar agtereenvolgende oorwinnings moet daar Skotse rugbyondersteuners wees wat dink dat hul span reeds die Sesnasiesreeks in die sakkie het.
Die doedelsakspelende hardebaarde het onlangs verspotmaklik met Tonga afgereken, terwyl hulle verlede naweek ook te sterk vir die Wallabies in Edinburgh was. Speel hulle Saterdag met die Springbokke klaar en hul selvertrouebeker sal tot oorlopens toe vol wees.
Een van die gevaarmanne in die Skotse trui is ongetwyfeld Finn Russell.
Die 29-jarige losskakel het so byna dinge vir die Springbokke deurmekaar gekrap toe hy uiteindelik speelkans in die Britse en Ierse Leeus-reeks gekry het, terwyl hy gereeld met sy aanvallende spel beïndruk.
Hoewel hy geskerts het dat hy sy skopvoet dalk meer teen die Bokke sal inspan, weet Elton Jantjies wat om van sy moontlike direkte teenstander te verwag.
“Ons almal weet wat Finn op ’n rugbyveld kan doen en hy het ongetwyfeld ’n verskil in daardie Leeus-wedstryd gemaak. Ons sal egter steeds op ons eie spel fokus en seker maak dat ons opgewasse teen enige aanslag is. Dit is belangrik om nie net na jou teenstanders se vertonings te kyk nie, maar ook weekliks na maniere soek om self te verbeter,” het Jantjies gesê.
Finn Russell just letting Petrus du Plessis know who's the boss at Murrayfield earlier????#SCOvAUS pic.twitter.com/QMupWMrpjp
— Stuart McAvoy (@stuart__mcavoy) November 7, 2021
Die Suid-Afrikaners is natuurlik ook slim genoeg om nie net in die Finn-gevaar vas te kyk nie; Hamish Watson het met ’n sterk vertoning teen die Wallabies vorendag gekom, terwyl Kyle Steyn vier drieë teen Tonga gedruk het.
Al het die Springbokke die afgelope ses toetse teen die Skotte gewen, sal hulle steeds Saterdag hul storie moet ken. Daar sal immers duisende toeskouers wees wat hul bloed soek.
Uitslae van die Springbokke se afgelope toetse in Skotland (Suid-Afrikaners se telling eerste):
34 – 10 in 1994
68 – 10 in 1997
35 – 10 in 1998
46 – 29 in 1999
6 – 21 in 2002
45 – 10 in 2004
27 – 3 in 2007
14 – 10 in 2008
17 – 21 in 2010
21 – 10 in 2012
28 – 0 in 2013
26 – 20 in 2018
All set, team? ????????????????????????????????#AsOne pic.twitter.com/ieismtny0N
— Scottish Rugby (@Scotlandteam) November 11, 2021
Siya, Kwagga en Damian wag vir jou. En as hulle moeg is kom Eben en Marx :-)
Vra maar vir menige span hoe sit mens die kurkprop terug in die sjampanje bottel