Stormers laat weer bloos teen Jaguares

Argieffoto (Stormer-ondersteuners op Nuweland) (Foto: ANA)

ʼn Mens kan maar net kopskud oor die Stormers se vertoning Saterdagaand teen die Jaguares in Buenos Aires.

Die Jaguares het met 30-25 gewen, drie drieë teenoor een gedruk en hul kans lewendig gehou om tot die uitspeelrondes deur te dring. Vir die Stormers is dit na alle waarskynlikheid neusie verby, weer die einde van die pad, al keer hulle nou terug na Nuweland om verlore aansien te probeer herwin.

Ja, sal van die Stormers-ondersteuners sê, die Jaguares is niks anders nie as die Argentynse span in Superrugbytruie nie, maar wat dan van die Springbokke wat gewemel het in die Stormers-span?

Hoe verduidelik jy dit as jou span, wat van die beste aanvallers agterlangs het, tot dusver net 22 drieë in 11 wedstryde kon druk? Dit is die minste van al die spanne in die reeks. Waar is die flair en vaart van die Stormers- en Westelike Provinsie-spanne van die verlede?

Hoe verduidelik jy dit as jou voorspelers oorheers, maar jy steeds nie kan afrond nie? Hoe verduidelik jy dit as jy aan die einde van die wedstryd jou laaste kans om met ʼn rolmaalbeweging die wedstryd te wen, die lynstaaningooi verbrou?  Die Jagaures was boonop sonder hul ysterflank Pablo Matera, wat ʼn geelkaart gekry het.

Die Stormers het die Jaguares in die skrums opgefrommel, hulle het tonne besit gehad, maar kon nie afrond nie.

Hulle het 124 keer verdedig, waarvan 23 verbrou is. Dis byna ʼn kwart van alle duikslae!

Dit is nie maklik nie om in Buenos Aires te wen nie, want die Jaguares speel in jou gesig, boer op die onkantlyn, maak jou besit stadig, dwing jou in foute, duik jou nerwe af, en dan het hulle baie goeie aanvallers.

Maar is daar nie ʼn teenvoeter vir sulke spel nie? Wat word daar Maandagoggende gesê wanneer daar video-ontleding gedoen word? Staan die afrigters pa vir die foute? Aanvaar die spelers verantwoordelikheid vir swak besluite, vrot hantering, swak dissipline?

Ja, soms is ʼn mens baie krities en dalk te kras, maar dis omdat ʼn mens omgee, omdat jy weet jou span kan beter, dat ʼn nederlaag seer maak.

Punte:

Jaguares 30 (13) Drieë: Pablo Matera, Ramiro Moyana, strafdrie (7 punte). Doelskoppe: Domingo Miotti (2). Strafdoele: Miotti (3).

Stormers 25 (9): Drie: Seabelo Senatla. Doelskop: Damian Willemse. Strafdoele: Jean-Luc du Plessis (4), Willemse (2).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
kolla

Ek het voor die tyd gedink die Stormers sou verder verloor om eerlik te wees. Ons kon hulle darem op Nuweland klop. Hoeveelheid Springbokke sê niks want ons nasionale span verloor ook maar in Argentinie.

Babertondaisy

Jaguares se voorspelers was te hard vir die Stormers. Duikslae brutaal. En natuurlik het die Jaguares 4 lynstane by ‘n springbok slot en haker gevat. Nadat Jaguares slot Lavanini vir Etsebet vasgevat het was hy tjoepstil. Stormers verdediging ontaard deur die bal tussen Jaguares aangee te klap om driee te verhoed. Pateties vir ‘n span met soveel springbokke.

Smirre

Stem saam bolla dat ‘n span met soveel springbokke teen ‘n asado semi professional spannetjie so pateties verloor wie sou dit ooit kon raai ???

marco polo

Moet ek dit dan nou na elke naweek se? Vervang die afrigter. Ek sal liewer stilbly oor die kaptein.

kolla

Hoeveel keer het die Nulle die asados vanjaar geklop en wat was die tellings?