Dysselsdorp Rangers het Korrektiewe Dienste Saterdag oortuigend in die Suidwestelike Distrikte (SWD) se Karooliga geklop.
Rangers het 48-17 op Oudtshoorn gewen nadat hy rustyd 22-0 voor was.
Andries Jacobs, die sekretaris van die wenklub, sê Dysselsdorp se grofgeskut voorlangs was eens te veel vir die bewaarders.
Die voorspelers het ses van sy sewe drieë gedruk. Die agtsteman, Eric Campher, het `n driekuns behaal. Fergus Lewis (flank), Shavandre Briekwa (flank) en David Coerecius (stut) het die ander voorspelerdrieë gedruk.
Vernon Visagie (skrumskakel) was die enigste agterspeler wat agter die lyn kon kuier en hy het `n strafdoel en `n doelskop bygevoeg. Davestin Esau (heelagter) het vier drieë verdoel.
Jacobs sê Ceril Sibanda (stut), die twee flanke, Briekwa en Lewis, was die uitblinkers in die voorhoede.
“Agterlangs het Esau weer met stewige spel sy gebruiklike pond vleis na die tafel gebring.”
Dysselsdorp speel eerskomende Saterdag op sy tuisveld teen Calitzdorp. Die hekke open 12:00 met skolewedstryde op die voorprogram.
♦ Evergreens (Pacaltsdorp) is steeds ver voor in die Premierliga, met Barbarians (Mosselbaai), Progress (George) en Blanco wat die volgende drie plekke vul. Bridgton (Oudtshoorn) is die beste geplaaste buiteperd.
In die Presidenstliga keil Maori’s (George) en George mekaar in die Kusstreek op; Heidelberg en Riversdal Blues spook sake in die Langebergstreek uit; en Willing Hearts (Prins Albert), Spring Roses en Harlequins (albei Oudtshoorn) is die voorlopers in die Karoostreek.
Opgesomde punteleer –
Premierliga
Evergreens 46, Barbarians 33, Progress 27, Blanco 27, Bridgton 24, Crusaders (George) 22, Groot-Brakrivier 22, NMMU (Saasveld) 20, Silver Stars (George) 18, Swellendam 7.
Presidentsliga
Karoo
Willing Hearts 20, Spring Roses 19, Harlequins 18, Beaufort-Wes 16, Willowmore 15, Uniondale 15, All Blacks 13, Collegians (Oudtshoorn) 13.
Kus
Maori’s 26, George 25, Thistles (Plettenbergbaai) 22, Jaguars (Groot-Brakrivier) 22, Happy Hearts (Mosselbaai) 18, Bitou (Plettenbergbaai) 15, Eagle Stars (Sedgefield) 4, Mosselbaai 0.
Langeberg
Heidelberg 31, Riversdal Blues 26, Albertinia Rangers 24, Seagulls (Stilbaai) 16, Barrydale 16, Ladismith 14, Arrows (Slangrivier) 10, Zoar 1.