Groot-Brakrivier het Saterdag vir ʼn lekker verrassing in die Suidwestelike Distrikte (SWD) se Premierliga gesorg.
Hy het die naasvoorloper, Bridgton van Oudtshoorn, tot ʼn gelykop uitslag van 29-29 gedwing.
Elkeen van die spanne het vier drieë gedruk.
Die voorloper, Progress van George, het sy posisie verstewig met ʼn oortuigende sege van 48-22 oor Blanco.
Evergreens van Pacaltsdorp, die verdedigende kampioen en die SWD se Goue Bekerspan die afgelope paar jaar, het met 25-15 teen Crusaders (George) gewen.
Mosselbaai Barbarians het met 20-7 teen Silver Stars, nog ʼn George-klub, geseëvier.