Tweekuns vir gewese Kapenaar in Roemenië

ʼn Gewese Kaapse rugbyspeler het twee drieë in die jongste ronde van die Roemeense Superliga gedruk.

Dumisani Mtya (slot) se span, Baia Mare, het die Universiteit Cluj met 42-7 onderstebo geloop.

Hy het Schotschekloof-Walmers (SKW) in die Westelike Provinsie se Superliga A verteenwoordig.

♦ In nóg ʼn kragmeting in dié reeks het Hendrik Mulder (losskakel), ʼn gewese o. 21-speler van die Goue Leeus ʼn doelskop en ʼn strafdoel vir Dinamo București teen Steaua București behaal, maar sy span het met 15-27 verloor.

Kuselo Moyake, een van die wenspan se flanke, het homself ʼn geel kaart op die hals gehaal.

Hy het Curriebeker-rugby vir die eertydse OP Kings gespeel.

Franse Fédérale 1-liga

♦ Jaun Kotzé (heelagter) het agt punte met ʼn doelskop en twee strafdoele vir Beaune teen Bourgoin op die telbord geplaas, in ʼn wedstryd wat laasgenoemde met 28-18 gewen het.

Hy het die Valke en die Griffons in die reeks om die Curriebeker verteenwoordig.

♦ Wiehan Hay het ʼn drie gedruk wat Cognac/Saint Jean d’Angély gehelp het om Langon met 30-21 te verslaan.

Hay, wat die Pumas in die reeks om die Curriebeker verteenwoordig het, het vroeër in die kragmeting sy tweede geel kaart in twee wedstryde op die lyf geloop.

♦ Jeffrey Perkins (banksenter) het Castanet se sege van 19-17 oor Aubenas in die 79ste minuut met ʼn strafdoel beklink.

Hy, en drie van sy broers, het Curriebeker-rugby vir die Valke gespeel.

♦ Niel Bester (binnesenter) van Rodez het ʼn geel kaart in sy span se nederlaag van 14-26 teen Fleurance gekry.

Hy het op o. 19-vlak vir die WP gespeel.

Italiaanse Top12-liga

♦ In die Italiaanse Top12-liga het die Blitsbok Stef Basson (heelagter) ʼn doelskop en ʼn strafdoel vir I Medicei teen Viadana behaal.

Laasgenoemde het die stryd met 22-17 gewen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae