Verskeie klubskuiwe kom vanjaar in die ligas van die Griffons-rugbyunie.
Eugéne van Wyk, die hoof- uitvoerende beampte van die Griffons-rugbyunie, sê Hennenman, wat tot dusver in die bond se Eerste Liga (die Griffons-Luiperds-oorgrensliga) gespeel het, het aangedui dat hy vanjaar aan die Sandveldliga sal deelneem.
Bethlehem-oudskoliere, wat voorheen aan die Oos-Vrystaatliga deelgeneem het, gaan op sy beurt aan die Griffons se Eerste en Tweede Liga deelneem.
Voorts moet die Luiperds laat weet of hulle naas Vaal Reefs en Klerksdorp `n derde span in die oorgrensliga gaan inskryf.
Lichtenburg het verlede jaar die bond se Neser-A-liga gewen, maar het onlangs berig dat hy nog onseker is of hy in die hoër liga wil speel.
Corrie Craven, die sekretaris van die Oos-Vrystaatstreek, sê hul planne is agtermekaar en die liga begin 25 Maart.
“[Die klubs] is oorgehaal om mekaar op te dreun.”
Craven sê die Oos-Vrystaat se ligaformaat bly dieselfde en hulle speel weer in `n Noord- en `n Suidgroep om koste te bespaar. Omdat die omstandighede elke jaar verskil, is promosie-relegasiewedstryde nie ter sprake nie.
Collegians II van Bethlehem, Reitz, Harrismith, Frankfort en Heilbron vorm die Noordgroep; en Collegians I, Marquard, Ladybrand, Ficksburg, Lindley en Senekal die Suidgroep.
Lindley het nie verlede jaar aan die reeks deelgeneem nie.
Craven sê die streek beplan ook `n Township-gemeenskapsbeker met ses spanne waarvan die bepalings later uitgereik sal word.