Vyf treë vorentoe, tien agteruit

Allister Coetzee (Twitter)

Die Springbokafrigter, Allister Coetzee, sê hy wil eers kyk wat fout gegaan het in Saterdag se toets in die Rugbykampioenskap toe die All Blacks die Bokke met 57-0 in Albany verneder het voordat daar oorhaastige besluite geneem word.

Waarna wil hy kyk?

Hoe die Bokke agt drieë afgestaan het, hoe hulle die eerste keer in die afgelope 107 toetse nie ʼn punt kon aanteken nie; of hoe hulle 33 duikslae verbrou het en hoe hulle besit in vyf lynstane (met straks een van die beste slotpare in wêreldrugby) afgestaan het: of hoe die All Blacks hul grootste telling nog teen die Bokke geëwenaar het, en hoe die All Blacks met die grootste telling nóg (31-0) met rustyd voorgeloop het?

Kom ons maak dit nog makliker: Die All Blacks het in die afgelope vyf jaar in 11 toetse die Bokke tien keer geklop,  331 punte aangeteken en net 172 afgestaan, met ʼn gemiddelde telling van 30-15.

Die All Blacks het in die afgelope drie toetse met Coetzee aan die stuur 113 punte aangeteken en net 30 punte afgestaan. Hulle het in die proses 23 drieë gedruk en die Bokke kon net een keer hul doellyn oorsteek.

Daar word geskerm vir die onervare Bokke: verlede jaar toe die Bokke met  57-15 oorrompel is, het die Bok-spelers altesaam 615 toetse agter die blad gehad.

Wat van onervare All Blacks soos Damian McKenzie (6 toetse), Rieko Ioane (7), Nehe Milner-Skudder (10), Kane Hames (3), Nepo Laulala (7), Scott Barrett (11), Ofa Tu-unganasi (8), Liam Squire (11), Lima Sopoaga (11) en Anton Lienert-Brown (17) wat Saterdag almal in die opdrafspan was of opgestuur is?  Hoe is dit deur Suid-Afrika uitgebuit?

Toe Nick Mallett se Springbokspan in 1998 die All Blacks se wêreldrekord van 17 opeenvolgende toetsoorwinnings geëwenaar het, het hulle in die laaste toets teen Engeland 372 toetse agter die blad gehad.

Wat moet Raymond Rhule nog verkeerd doen om weggelaat te word?  Is daar werklik nie ʼn beter skrumskakel as Francois Hougaard  nie?

Is Trevor Nyakane werklik van toetsgehalte? Wat het verkeerd geloop in die lynstane? Is die lostrio doeltreffend genoeg?

As daar planne is om Vincent Koch (wat vir Saracens speel) as vaskopstut nader te trek, moet Ruan Combrinck, Cobus Reinach en Faf de Klerk en ander oorsese Bokke ook oorweeg word.

Kom ons vergeet van Saru se president, Mark Alexander (en vroeër ook die uitvoerende hoof, Jurie Roux) se belaglike voorstel dat daar voortaan dalk twee Springbokspanne (een vir die Suidelike Halfrond en een vir die Noordelike Halfrond) gekies kan word.

Kom ons kies eers een Springbokspan van werklike toetsgehalte.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

50 Kommentare

jongste oudste gewildste
rollie

Ja ons is verneder maar – die ontydige beserings van Cronje en Kriel het definitief ‘n invloed gehad. Ek sal ook ‘n paar veranderings wou aanbring, veral in die agterlyn. Daar is beter spelers as Jesse Kriel, Skosan, Rhule en Coetzee beskikbaar. Ons het verloor teen die beste span in die wereld op hul tuisveld. ‘n Span wat ons so tweekeer elke twintig jaar in NS klop. Ons het 7 gespeel en net 1 verloor sover, geen rede om op ‘n ashoop te gaan sit nie.

rollie

Deesdae moet mens ook versigtig wees om veel waarde te heg aan ‘n telling. Drie drieë kan reeds 21 punte wees en ‘n voorsprong van 30 hardloop maklik 50 toe want die wedstryd is basies reeds gewen. Beteken nie veel vir my nie.

Juan

Dit is die resultaat wanneer transformasie die belangrikste doelwit word in n organisasie. Die ouens wat skep gaan dit goed praat, verdedig en aanmoedig.

Toppie

Kom ons hou op om verskoning te maak , die Springbokke het uiters swak gespeel. Allister Coetzee hoef nie te gaan kyk wat verkeerd geloop het nie, hy moet die eerbare ding doen en bedank. Die kwota stelsel is Springbok rugby se ondergang. Saterdag tussen die Leeus en Blou Bulle was daar baie beter spelers as in die patetiese Springbokspan. Die Springbokke word groot geld betaal om vir SA te speel en daarom word daar verwag dat net die bestes sal speel of word spelers vergoed met Sassa grants.

anton

As ek moet sê wat ek van ons rugby dink, sal dit nie geplaas word nie.
Gelukkig het ek in/na 1995 my belangstelling in s.a rugby vaarwel geroep.
Pla my dus min wat eintelik daar gebeur.
Ons mense aanbid mos sport baie meer as vir God.