Wegholseges vir 4 SA breiers in Europese toetse

Kobus Potgieter – een van vier. (Foto: DRV)

Vier Europese nasionale spanne wat deur afrigters uit Suid-Afrika gebrei word, het Saterdag wegholseges in toetse behaal.

Boaan die lys is Kobus Potgieter, die hoofafrigter van Duitsland, wat die Brasiliaanse toerspan in Leipzig met 45-12 (rustyd 26-0) verslaan het.

In die reeks om die Rugby Europatrofee het die Kapenaar Gareth Gilbert se Nederlanders in Orhei, Moldawië, ʼn wegholoorwinning van 59-7 oor die tuisspan behaal (rustyd 26-7).

Gilbert het in sy speeldae Botswana en die gekombineerde Pan-Afrikaanse span, die Afrika-Luiperds, verteenwoordig, en Botswana se nasionale span later afgerig.

By Netanya se Wingate-instituut suid van Tel Aviv, Israel, het Kevin Musikanth, onder wie se afrigting die Ikeys die Varsitybeker gewen het, se Israeli-span met 44-8 teen Bosnië en Herzegovina in Afdeling 1 Suid van die Europese reekse gewen (rustyd 32-8).

Ciprus, wat deur Andrew Binikos afgerig word, het in Pathos, Ciprus, in Afdeling 2 Suid met 42-5 teen Oostenryk gewen (rustyd 21-0).

Binikos, die hoof van die Sharks se Suidelike akademie op Port Shepstone, het Curriebekerrugby vir die KwaZulu-Natallers gespeel, en toetsrugby vir Ciprus.

In die enigste ander toets Saterdag in die Europese reekse het Luxemburg tuis met 64-0 teen Estland in Afdeing 2 Noord gewen (rustyd 38-0).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.