WP: Brakke bult spiere; Vineyards ruk kampioen

brackenfellBrackenfell het sommer met die intrapslag Saterdag sy spiere in die Westelike Provinsie-rugbyunie (WPRU) se Superliga A gebult; en Vinyards het die Noorderligakampioen tot in sy fondamente geskud.

Die Brakke, wat jare laas in die topliga gespeel het, het by hul terugkeer Saterdag vir Schotschekloof Walmers (SKW) 35-26 geklop.

Op die koop toe het die klub se o.20-span, wat verlede seisoen onoorwonne afgesluit het, sy portuur by SKW 64-0 van die veld af gevee.

Vinyards wat tot die Noorderliga bevorder is nadat hy die Paarlliga gewen het, het sy buiging met `n dawerende knal gemaak deur verlede jaar se wenner, Blakes van Stellenbosch, 115-6 te verrinneweer.

kuilsrivierSuperliga A

♦ Die onoorwonne wenner van die Superliga B verlede jaar, Kuilsrivier, het heel mededingend in die A-liga vertoon deurdat Belhar hom slegs 17-14 kon klop; maar die derde nuweling, Noordelikes-Northlink Kollege (NNK), is 54-10 deur die Goue Bekerklub Valsbaai verniel. NNK het sy bevordering verdien deur Villager verlede jaar 27-17 in `n promosie-relegasiewedstryd te klop.

Hamilton het Primrose 48-17, en Tygerberg vir Sir Lowrians 48-16 afgeransel.

Superliga B

♦ In die Superliga B het Goodwood, wat die Superliga C die vorige jaar gewen het, St Georges, wat sy A-status verloor het, groot laat skrik deur rustyd 21-15 voor te loop. St Georges het egter teruggeveg en op die ou end 34-26 gewen.

Die afgeskuifde Helderberg het nog `n nuweling, Strand, 35-18 geklop, en Villagers het sy terugvegpoging met `n sege van 34-15 oor Macassar begin.

unimilUnie-Milnerton het verrassend ver gewen deur Young Peoples 87-0 te oorskadu.

Superliga C

♦ Hamediehs het sy bevordering uit die Promosieliga gevier deur Scottsdene-Sentraal 21-12 te klop, maar die ander twee bevorderderdes het slae gekry. Paarl het Lagunya 31-10 en Young Stars vir Kylemore 42-31 geklop.

Twee van die spanne wat hul B-status verloor het, het Saterdag in die C-afdeling gewen. Rangers het Elsies Rivier United 37-5 oorrompel; en Franschhoek United het Langa in `n strawwe stryd 9-7 ondergesit.

Die derde, Raithby Universals, is 15-13 deur Strand United geklop.

Stadsliga

♦ Die Stadsligakampioen, Western Zebras, het goed weggespring deur Young Ideas 26-16 te klop; en Busy Bees het Polisie in `n naelbytstryd 23-22 getroef.

Silvertree, wat sy Super C-status verloor het, het Watsonia maklik 23-5 geklop.

Suiderliga

♦ Retreat, wat die Suiderliga verlede jaar gewen het, het Titans in sy eerste wedstryd in dié liga vanjaar 18-0 geklop.

Young Wesleys het die afgeskuifde Noordelikes 27-9 afgeransel.

Noorderliga

♦ Naas Vinyards se aardskuddende sege oor Blakes in die Noorderliga het Stellenbosch Coronations, wat uit die Superliga C afgeskuif is, sy wedstryd teen Blue Stars United 20-13 gewen.

Ander uitslae –

Superliga B

Bellville 28, Violets 16; Collegians 31, Hamlets 29; Pniel Villagers 25, Hands & Heart 20.

Superliga C

Blue Jets 20, Masiphumelele 13.

Stadsliga

Temperance Cities 18, Perseverance 9; Caledonian Roses 18, Progress 0.

Suiderliga

Rocklands 20, Richmond Rangers 0.

Noorderliga

Van der Stel 43, Imiqayi 0; All Saints 23, Strand Pioneers  6; Atlantis 19, Whistling Wheels 18.

Paarlliga

Violets (Paarl) 41, Pêrel United 8; Simondium 29, Paarl Rangers 18; Agter-Paarl 29, Riverstones 23; Allendale 29, Young Gardens 13; Young Standards 18, Albions 14.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae