Tennis:
- Dit het hom weliswaar twee en ʼn half uur geneem, maar Suid-Afrika se Lloyd Harris is deur na die tweede ronde van die Franse Ope op Roland Garros.
Die jong Suid-Afrikaner het die Tsjeggiese Republiek se Lukas Rasol in ’n titaniese stryd van vyf stelle met 6-1, 4-6, 2-6, 6-1 en 6-2 gewen.
Krieket:
- Australië en Engeland was gister aan die wenkant in hul opwarmingswedstryde. Die Aussies het Sri Lanka met vyf paaltjies getroef, terwyl die Britte vir Afganistan met nege paaltjies gelooi het.
Vandag speel Indië teen Bangladesj, terwyl Nieu-Seeland vir Wes-Indië in die laaste van die opwarmingwedstryde pak.
- Intussen sal die Wanderers-stadion in Johannesburg amptelik as ’n “fan park” vir van die Wêreldbekerwedstryde beskikbaar wees. Protea-ondersteuners kan dus hul span se vordering op die groot skerm by dié stadion volg.
Wedstryde wat op die Wanderers vertoon sal word:
30 Mei: Suid-Afrika teen Engeland
23 Junie: Suid-Afrika teen Pakistan
27 Junie: Suid-Afrika teen Sri Lanka
6 Julie: Suid-Afrika teen Australië
Die halfeindstryde en eindstryd sal ook gewys word.
Sewesrugby:
- Cecil Afrika en Mfundo Ndhlovu is terug in die Blitsbokspan vir komende naweek se HSBC-sewestoernooi in Parys. Dié twee vervang die beseerde Kurt-Lee Arendse en Stedman Gans.
Vrouesokker:
- Banyana Banyana speel die naweek in ’n Wêreldbeker-opwarmingswedstryd teen Noorweë. Hul eerste WB-kragmeting is op 8 Junie teen Spanje.