Vandag se sportnuus

Kevin Anderson (Foto: Wimbledon, Twitter)

Tennis:

• Suid-Afrika se voorste manstennisspeler, Kevin Anderson, het maklik na die tweede ronde van die Wimbledon-toernooi in Engeland deurgedring.

Die 33-jarige Anderson, verlede jaar se finalis, het Frankryk se Pierre-Hugues Herbert met 6-3, 6-4 en 6-2 ore aangesit. In die proses het hy 16 kishoue geslaan.

• Intussen sal Lloyd Harris later vandag teen die wêreld se beste grasbaanspeler, Roger Federer, te staan kom.
• Nóg ’n Suid-Afrikaner, die dubbelster Raven Klaasen, sal sy veldtog amptelik môre begin. Klaasen en sy Nieu-Seelandse spanmaat, Michael Venus, het ook verlede jaar in die eindstryd gespeel.
• Die eerste dag was propvol opskuddings met Venus Williams, Naomi Osaka, Alexander Zverev en Stefanos Tsitsipas wat almal uitgeskakel is.

Rugby:

• Die Cravenweek het gister amptelik by Grey Kollege in Bloemfontein afgeskop met die gasheerprovinsie wat die Haaie oortuigend met 46 – 24 gewen het.

Die uitslae:

Westelike Provinsie 50 – 24 Boland

SWD Arende 43 – 22 Pumas

Valke 43 – 24 Luiperds

Vrystaat 46 – 24 Haaie

Krieket:

• Gister op Chester-le-Street het Sri Lanka die Wes-Indiese Eilande met 23 lopies geklop.

Sri Lanka het eerste gekolf en 338/6 in hul toegelate 50 boulbeurte aangeteken, waarna hulle die Eilandmanne – met ’n veglustige Nicholas Pooran (118) voor in die koor – tot 315/9 beperk het.