Vandag se sportnuus

Steve Smith vier sy honderdtal. Foto: Cricinfo.

Krieket:

• ’n Emosionele Steve Smith het gister op Edgbaston sy 24ste honderdtal vir Australië in toetskrieket aangeteken. Dit was die gewese Aussie-kaptein se eerste toets nadat hy ʼn jaar lank uit internasionale krieket geskors is weens verlede jaar se balpeuter-skandaal op Nuweland teen die Proteas.
• Sy honderdtal (144) het die besoekers in staat gestel om 284 in hul eerste beurt aan te teken nadat Engeland se Stuart Broad en Chris Woakes aanvanklik amok onder die besoekers se kolwers gemaak het.
• David Warner, wat saam met Smith en Cameron Bancroft vir die skandaal geskors is, kon net twee lopies aanteken voor hy deur Broad been voor paaltjie betrap is. Die Engelse ondersteuners het hom uitgejou, terwyl hulle stukkies skuurpapier in die lug geswaai het.

Gholf:

• Suid-Afrika se Ashleigh Buhai is die voorloper ná die eerste ronde van die Britse Ope se vroue-gholftoernooi. Sy het ’n ronde van 65 (sewe onder die baansyfer) gespeel.

Rugby:

• Die oud-Springbok, Ruan Pienaar, is inderdaad op die Cheetahs se plaasvervangersbank ingesluit vir hul Curriebeker-wedstryd vanaand teen die Leeus op Bloemfontein. Die 35-jarige Pienaar het ’n kontrak van twee jaar met die Vrystaters geteken nadat hy die afgelope paar seisoene onder andere sy rugby in Ierland en Frankryk gespeel het.
• Die wedstryd begin om 19:15.

Sokker:

• Arsenal het die duurste kopie in hul klubgeskiedenis gedoen toe hulle die Franse vleuel Nicolas Pepe van Lille gekoop het. Die kopie het die Engelsmanne R1,275 miljard uit die sak gejaag.