Die Chiefs sal een van die spanne in Nieu-Seelande se hersiende weergawe van die Superreeks wees. Foto: Twitter.
Rugby:
- Daar is lig aan die einde van die Covid-19-tonnel vir rugbyliefhebbers in Nieu-Seeland.
New Zealand Rugby (NZR) het bevestig dat ’n plaaslike weergawe van die Superrugby-reeks op 13 Junie sal begin. Dit volg ná die regering se aankondiging dat rugby en netbal tydens vlak 2 van die land se afsonderingsregulasies hervat mag word.
Volgens die hersiende weergawe van die Superrugby-reeks sal die Chiefs, Highlanders, Blues, Hurricanes en Crusaders in aksie wees. Die toernooi sal oor tien weke plaasvind met wedstryde wat op Saterdae en Sondae gespeel word.
Die wedstryde sal egter agter geslote deure gespeel word totdat die Nieu-Seelandse regering beslis dat toeskouers weer toegelaat mag word.
“Die vooruitsig van vyf Kiwi-spanne van wêreldgehalte wat sake oor tien weke uitspook, sal ’n glimlag op baie mense se gesigte plaas. Ek weet die spelers is baie opgewonde oor die aankondiging,” het die uitvoerende hoof van NZR, Mark Robinson, gesê.
Bepalings vir Junie:
13 Junie: Highlanders teen Chiefs
14 Junie: Blues teen Hurricanes
20 Junie: Chiefs teen Blues
21 Junie: Hurricanes teen Crusaders
27 Junie: Blues teen Highlanders
28 Junie: Crusaders teen Chiefs
Sokker:
- Intussen is vyf spelers in die Spaanse La Liga-reeks positief vir Covid-19 getoets.
Verskeie topklubs, waaronder Barcelona, het op ’n individuele grondslag weer terug na die oefenveld gekeer.
