Krieket:
- Die Wes-Indiese Eilande het gister in Southampton geskiedenis gemaak toe hulle Engeland met vier paaltjies geklop het. Sodoende het die Eilandmanne die eerste toetswedstryd van die Covid-19-era gewen.
Die besoekers moes 200 lopies vir ’n oorwinning jaag en Jermaine Blackwood se beurt van 95 het die wa deur die drif getrek.
Hoewel Jofra Archer (3/45) gesorg het dat hulle vroeg in hul beurt op 27/3 gesteier het, het Blackwood en Roston Chase (37) die Windies se beurt weer op koers gekry.
Shannon Gabriel, wat met ’n boulontleding van 9/137 in die wedstryd spog, is as die speler van die wedstryd aangewys.
Die volgende wedstryd in die reeks begin Donderdag in Manchester.
Rugby:
- In die Nieu-Seelandse Aotearoa-reeks het ’n tikkie Will Jordan-toorkuns die wedstryd vir die Crusaders teen die Blues gewen.
Die Aucklandse span het tot die 62ste minuut van die kragmeting met 15 – 9 voorgeloop, maar Jordan se drie het die weg vir ’n Crusaders-oorwinning gebaan.
Hulle het uiteindelik met 26 – 15 gewen.
Puntemakers:
Crusaders: Drieë: Mitch Drummond en Will Jordan. Doelskoppe: Richie Mo’unga (2). Strafskoppe: Richie Mo’unga (4).
Blues: Drieë: Mark Telea en Rieko Ioane. Doelskoppe: Otere Black (2). Strafskop: Otere Black.
- Die voormalige Stormers-vleuel Kobus van Wyk het nóg ’n drie vir die Hurricanes gedruk in hul goeie oorwinning van 17 – 11 oor die Highlanders in Wellington.
Puntemakers:
Hurricanes: Drieë: TJ Perenara, Kobus van Wyk en Devon Flanders. Doelskop: Jordie Barrett.
Highlanders: Drie: Aaron Smith. Strafskoppe: Mitchell Hunt (2).
Atletiek:
- Die voormalige 100 m-wêreldrekordhouer Asafa Powell het vyfde in sy eerste 100 m-wedloop van 2020 geëindig.
Nesta Carter het in Kingston die wedloop met sy tyd van 10,38 s gewen, met Powell wat met ’n 10,51 s tevrede moes wees.