Atletiek:
- Suid-Afrika se vinnigste man, Akani Simbine, het gister die goue medalje in die 100 m-item by die Brons-byeenkoms in Marseille gewen.
Die blitsige Tuks-atleet het die wenstreep eerste met tyd van 10,19 sekondes oorgesteek, ’n kortkop voor die Ivoorkus se Arthur-Gue Cisse.
Die Suid-Afrikaner het in Maart die vinnigste 100 m-tyd van 2020 gehardloop toe hy die Gauteng-Noord Kampioenskap met sy tyd van 9,91 sekondes gewen het.
Die 100 m-uitslae van gister se wedloop in Marseille:
- Akani Simbine (Suid-Afrika): 10,19 sekondes
- Arthur-Gue Cisse (Ivoorkus): 10,21 sekondes
- Mickael Rodgers (VSA): 10,27 sekondes
- Mouhamadou Fall (Frankryk): 10,46 sekondes
- Dylan Rigout (Frankryk): 10,56 sekondes
Tennis:
- Ná sy heldedade in die openingsronde van die Amerikaanse Ope in New York is Brittanje se Andy Murray deur Kanada se Felix Auger-Aliassime uitgeskakel.
Die Kanadees het die kragmeting met 6-2, 6-3 en 6-4 gewen.
Oostenryk se Dominic Thiem het op sy 27ste verjaardag ook verspot maklik met Indië se Sumit Nagal klaargespeel om hul wedstryd met 6-3, 6-3 en 6-2 te wen.
Novak Djokovic, die wêreld se voorste speler, speel vandag teen Duitsland se Jan-Lennard Struff in die derde ronde.
Japan se Naomi Osaka sal ook tot die baan terugkeer wanneer sy teen Marta Kostyuk van die Oekraïne te staan kom.
Krieket:
- Die eerste T20-kragmeting tussen Engeland en Australië begin vanaand in Southampton. Die twee spanne sal ook in ’n eendagreeks gewikkel wees.