Krieket:
- AB de Villiers het gisteraand sy 200ste ses vir die Royal Challengers Bangalore geslaan toe hy een van Sandeep Singh se aflewerings oor die grens in Dubai gemoker het.
Die voormalige Protea-kaptein het uiteindelik 51 van slegs 30 aflewerings teen die Sunrisers Hyderabad geslaan om ’n sleutelrol in RCB se oorwinning van tien lopies te speel.
Sy Protea- en RCB-spanmaat, Dale Steyn, het effens gesukkel en moes met boulsyfers van 1/33 tevrede wees.
In vandag se wedstryd speel die Rajasthan Royals teen die Chennai Super Kings in Sharjah. Die aksie begin om 16:00 en sal op SuperSport uitgesaai word.
Tennis:
- In tennisnuus het Roemenië se Simona Halep haar eerste Italiaanse Ope-titel gewen toe sy Karolina Plíšková in die eindstryd in Rome geklop het.
Halep het die eerste stel op ’n drafstap met 6-0 gewen, waarna die Tsjeggiese speler weens ’n besering die handdoek in die tweede stel moes ingooi.
Die telling was toe 2-1 in Halep se guns.
- Dan het Serwië se Novak Djokovic sy vyfde Italiaanse Ope-titel verower toe hy Argentinië se Diego Schwartzman met 7-5 en 6-3 in die eindstryd gewen het.
Die Franse Ope begin Vrydag in Parys.
Rugby:
- Die Blitsbokke se JC Pretorius en Selvyn Davids is vir die Wêreldsewesreeks se Droomspan vir die 2019/’20-seisoen gekies.
Die twee Suid-Afrikaners is saam met Scott Curry (Nieu-Seeland), Tavite Veredamu (Frankryk), Napolioni Bolaca (Fidji), Jordan Conroy (Ierland) en Aminiasi Tuimaba (Fidji) in die span opgeneem.
AB het darem net sy knieg gebuig om sesse te slaan.