Die sosialemediaplatform TikTok het sedert 2019 drasties gegroei en talle Suid-Afrikaanse gebruikers het reeds baie gewild op die video-app geraak.
TikTok laat gebruikers toe om video’s van tussen 3 en 60 sekondes te publiseer. Hulle kan musiek in die agtergrond laat speel, of in die kamera in praat of sing. Gewilde gebruike vir die app is om danspassies te deel op maat van ʼn bekende liedjie, poetse te bak, of stories te vertel.
Maroela Media het vroeër berig dat drie Amerikaanse tienermeisies die hoogs betaalde TikTok-gebruikers ter wêreld is. Die 19-jarige Amerikaner Addison Rae span die kroon op TikTok en het in die afgelope jaar sowat R88 miljoen op dié app gemaak.
Maar dit is nie net die Amerikaners wat gewild is op TikTok nie, hierdie Suid-Afrikaners spog ook met miljoene volgelinge wat hulle op TikTok dophou.
Wian van den Berg, meer bekend as @wianmagic, is Suid-Afrika se bekendste TikTok-gebruiker. Hy het 9,7 miljoen volgelinge wat getrou sy kulkuns op die platform dophou.
Daniel Vermaak (@danielvx) het 2,7 miljoen volgelinge en is meestal bekend vir modevideo’s en video’s waar hy saam met liedjies sing.
Chané Grobler (@chanegrobler) vermaak gereeld haar 2,1 miljoen volgelinge met danspassies of saamsingvideo’s.
Jessica Ballinger (@theonlymissballinger) is bekend vir grappige video’s wat sy met haar 1,6 miljoen volgelinge deel.
Troy Shepherds (@troyshepherds) het 1,1 miljoen volgelinge en gebruik TikTok hoofsaaklik vir inhoud met ʼn komiese aanslag.
Vir my is van rensburg, jou dronkgat die beste.