Mitsubishi het pas sy Pajero Sport ʼn bietjie opgeknap; daar is drie modelle in die reeks.
Die Pajero Sport, soos die ander drie in dié segment, is op sy bakkie-boetie, die Triton, gebaseer. Die ander spelers in die segment is Ford se Everest, Isuzu se mu-X en Toyota se Fortuner.
Die intreemodel is ʼn gewone 4×2- outo, dán ʼn 4×4-outo en die reeks word afgerond met ʼn nuwe model – die Pajero Sport Exceed 4×4-outo. Al drie word deur Mitsubishi se puik 2.4 MIVEC-viersilinderturbodiesel aangedryf. Die 2.4 bied 133 kW en 430 Nm en gaan gepaard met ʼn lekker 8-spoed outo.
Al drie modelle bied drie rye sitplekke en het plek vir sewe. Al die sitplekke is met mooi leer oorgetrek. Die paneelbord in die Pajero Sport het altyd luuks gevoel, maar sal nou nóg beter wees met die nuwe digitale instrumente en 8”-raakskerminligtingstelsel. Aan die veiligheidskant spog die Pajero Sport met sewe lugsakke, ABS met EBD, noodremhulp, wegtrekhulp, outomatiese ligte en ruitveërs en parkeersensors met ʼn truratkamera.
Wat die Exceed bó sy maats laat uitblink, is ʼn sondak, Mitsubishi-afstandbeheerkonnektiwiteit en ʼn elektroniese kattebakdeur met skopsensors waar ʼn mens net jou voet onder die buffer waai dan maak die deur oop of toe.
Mitsubishi se Super Select II 4×4-stelsel is een van die bestes op die mark en op die Exceed-model is daar vier rymodusse waartussen eienaars kan kies. Ek het al ʼn paar 4×4-hindernisse met die Triton en Pajero Sport aangedurf, en die stelsel is werklik fantasties.
Ons gaan binnekort ʼn tydjie met die opgeknapte Pajero Sport deurbring en sal dan verslag doen oor hoe hy hom op die pad gedra. Desember is ons bevoorreg genoeg om met die Pajero Sport te sleep en ons sal vroeg Januarie verslag doen oor hoe hy sleep.
Terwyl jy wag, gaan kyk gerus in die vertoonlokale, want teen die prys is hy baie aantreklik in vergelyking met sy mededingers.
Die reeks lyk só:
Mitsubishi Pajero Sport 4×2 outo | R609 995 |
Mitsubishi Pajero Sport 4×4 outo | R659 995 |
Mitsubishi Pajero Sport Exceed 4×4 outo | R679 995 |
Die reeks word gedek deur ʼn 3 jaar/100 000 km-waarborg en 5 jaar/90 000 km-diensplan.
Die kompetisie lyk só:
Ford Everest 2.0SiT XLT 4×2 outo | 132 kW/420 Nm | 7,1 ℓ/100 km | 4 jaar/120 000 km-waarborg 6 jaar/90 000 km-diensplan | R637 800 |
Isuzu mu-X 3.0TD 4×2 outo | 130 kW/380 Nm | 7,3 ℓ/100 km | 5 jaar/120 000 km-waarborg 5 jaar/90 000 km-diensplan | R643 100 |
Toyota Fortuner 2.8 GD-6 4×2 outo Epic | 130 kW/450 Nm | 8 ℓ/100 km | 3 jaar/100 000 km-waarborg 9-dienste-diensplan | R673 200 |
Daar is net een ding beter as ‘n Pajero, is nog ‘n Pajero….wens ek kan myne inruil vir so nuwe exceed.
Stem 100% saam Gerhard.
Nee dankie, hou hom maar……. YUK