Die warm luikrugsegment het klomp mededingers. Almal se smaak verskil, en dit hang af wie wat met hom wil maak, maar my gunsteling is dié van hulle wat 100% doelgerig is. Hard, onbeskof en verkieslik handrat.
Ja, ʼn Golf R is een van die vinnigste luikrûe in die werklikheid danksy vierwielaandrywing – maar daar is een motor wat so twee jaar terug my hart geheel en al gesteel het – dis Honda se Civic Type R. Nou praat ek met die manne by Renault, en iemand wie se oordeel ek werklik vertrou, wat al die splinternuwe Renault Megane RS 300 Trophy onder hande gehad het, sê die Renault is beter as die Honda.
Kyk – Renault het ʼn ryk geskiedenis met motorsport. Ons het in 2005 die eerste Megane RS Trophy gesien … en sedertdien was elkeen ʼn treffer. In ʼn stadium was dit die vinnigste voorwielaangedrewe motor óm die Nürburgring … indrukwekkend.
Die nuwe Trophy bied 221 kW en 400 Nm in die handratmodel, en 420 Nm in die EDC-dubbelkoppelaarratkas. Vierwielstuur is standaard op die Megane en maak dit ʼn uiters ratse rakker. Die voorste ewenaar met beperkteglipfunksie verhoed wieltol, en met baie slim programmering strek ʼn mens omtrent uit ʼn draai. Dis indrukwekkend om te voel.
Ons gaan binnekort ʼn tydjie kry agter die stuur van die Trophy – en sal dan ʼn indiepteresensie gee oor die ervaring. Daar sal ongelukkig nét sewe Renault Megane RS 300 Trophy’s in die land inkom, so eksklusiwiteit is gewaarborg, maar teen watse prys? Ek wonder of die Golf GTI TCR en Hyundai i30N werklik R100 000 minder motor is as die Renault …? Tyd sal leer.
Die Renault Megané RS 300 Trophy lyk só:
Model | Krag | 0–100 km/h | Topspoed | Prys |
Renault Megane RS 300 Trophy handrat | 221 kW/400 Nm | 5.7 sek | 260 km/h | R774 900 |
Renault Megane RS 300 Trophy EDC | 221 kW/420 Nm | 5.7 sek | 260 km/h | R799 900 |
Die kompetisie lyk só:
Model | Krag | 0–100 km/h | Topspoed | Prys |
Volkswagen Golf GTI TCR | 213 kW/380 Nm | 5.6 sek | 264 km/h | R669 000 |
Hyundai i30N | 202 kW/353 Nm | 6.1 sek | 250 km/h | R679 900 |
Audi S3 Quattro Sportback | 228 kW/400 Nm | 4.6 sek | 250 km/h (beperk) | R724 189 |
Honda Civic Type R | 228 kW/400 Nm | 5.8 sek | 272 km/h | R741 900 |
BMW M135i xDrive | 225 kW/450 Nm | 4.8 sek | 250 km/h (beperk) | R773 788 |
Mercedes-AMG A35 4Matic | 225 kW/400 Nm | 4.7 sek | 250 km/h | R815 000 |
Subaru WRX Sti | 221 kW/407 Nm | 5.2 sek | 255 km/h | R817 000 |
Nou wat op aarde wil sommige motor vervaardigers nog bewys? Hoeveel Kw uit ‘n stuk fossiel aangedrewe meganieka getap kan word voordat die amps, volts en Kv oorvat?
Waar kom die amps, volts en kV vandaan?
Fossiel aangedrewe fossielle wat die hele laeveld besoedel as Eksdom se steenkool vretende monsters die dag werk en nie op Kaapstad se noodkrag diesel fossiel vretende turbines moet staatmaak nie…..
Daar is nie fossiel aangedrewe kragstasies van ESKOM in die Laeveld, eerder die Hoëveld, Middelburg en Ermelo omgewing. Teen 2026 gaan die meerderheid nuwe motors op die mark EV wees, ek sien uit na die era!
Daar bestaan nie so iets soos “die beste voertuig”, dit is eitlik, goed, beter, my keuse.
Lekker ry!