BMW het ʼn tydjie terug die G20 BMW 3-reeks in Suid-Afrika bekendgestel. Aanvanklik was daar slegs die 320d en 330i. Die 330i in die nuwe reeks is ʼn viersilinder-turbopetrolenjin. Al is die nuwe reeks enjins kragtig én lig op brandstof, mis ek steeds die gebrul van ʼn ware BMW-sessilinder. Tot nou.
Die BMW M340i is ook nie nét ʼn sessilinder nie. Die M vooraan beken hier is heelwat wintie in dié BMW, waaronder die turbo wat aan die 3.0-sessilinder gekoppel is. Tweedens het die M340i xDrive- dit is vierwielaandrywing.
Saam met die reeds bekwame onderstel en die nuwe opknappings is die mini-M fantasties. Die eerste keer toe ek my voet in die mat begrawe kon ek nie help nie om by myself te wonder – as die ding só loop – waarheen is hulle op pad met die werklike vol vet M?
Die ontwerp is die gewone G20 3-reeks met ʼn M-Sport visueleopknappingspakket aan. Die binneruim is gewone 3-reeks waar jy kan kies en keur om enige model vir jouself pas te maak.
Waar dinge interessant raak is by die enjin. 285 kW klink nie mal in moderne taal nie, maar die 500 Nm wringkrag van ʼn petrolmotor is waar dinge ernstig raak. Die BMW trek laat dit klap met 0 – 100 km in ʼn blitsige 4,4 sekondes. Die M340i is elektronies beperk tot 250 km/h, maar ek is oortuig dat as mens die halsband losmaak 300 km/h nie ver buite bereik is nie.
Ja, die BMW ry effe hard – maar dit moet só wees want dit is ʼn sportsedan. Die padhouvermoë is waar dinge vir my amper ʼn groot probleem geword het. Dit lyk my BMW het ʼn strategieverandering gemaak. Hul onderstelle was altyd gestel om meer stuurtraagheid te bied eerder as oorywerigheid. Dit was veiliger om die agterent agter te hou in slegte weerstoestande.
Die nuwe vierwielaangedrewe onderstel van die M340i is beslis meer gerat vir oorywerigheid as jy dit só wil hê. Ek het amper my moses tee gekom op ʼn stuk pad, en dit maak nie sin nie. ʼn Vriend is oortuig dat daar dalk olie of diesel op die pad moes wees, maar my raad aan enige M340i koper is: “Pasop vir hom, hy byt!”
Audi, BMW en Mercedes het nou fantastiese produkte in die louwarm sedansegment. Mercedes-AMG se C43 het ook vierwielaandrywing soos BMW se M340i so wel as Audi se S4. Daar is al vir dekades ʼn gesonde wedywering tussen die drie vervaardigers, en dit dryf hulle om hul beste voet voor te sit. Hou so aan julle.
Die reeks lyk só:
| BMW 320i | 135 kW/ 300 Nm | 6.3 ℓ/ 100 km | R643 036 |
| BMW 320d | 140 kW/ 400 Nm | 4.6 ℓ/ 100 km | R680 886 |
| BMW 330i | 190 kW/ 400 Nm | 6.4 ℓ/ 100 km | R683 416 |
| BMW 330d M Sport | 195 kW/ 580 Nm | 5.5 ℓ/ 100 km | R815 563 |
| BMW M340i xDrive | 285 kW/ 500 Nm | 7.7 ℓ/ 100 km | R1 002 211 |
Die reeks word gedek deur ʼn 2 jaar/ onbeperkte km waarborg en 5 jaar/ 100 000 km omvattende instandhoudingsplan.
Die kompetisie lyk só:
| Audi S4 Quattro | 260 kW/ 500 Nm | 4.7 sek | 250 km/h | 1 jaar/ onbeperkte km waarborg 5 jaar/ 100 000 km omvattende instandhoudingsplan | R840 500 |
| Lexus IS350 F-Sport | 232 kW/ 380 Nm | 5.9 sek | 225 km/h | 7 jaar/ 105 000 km waarborg 7 jaar/ 105 000 km omvattende instandhoudingsplan | R863 200 |
| Mercedes-AMG C43 4Matic | 287 kW/ 520 Nm | 4.7 sek | 250 km/h | 2 jaar/ onbeperkte km waarborg 5 jaar/ 100 000 km omvattende instandhoudingsplan | R1 022 765 |
Wat ek nie verstaan van BMW en Mercedes nie, is dat hulle name vir die motors nie meer die motor reflekteer nie, is amper asof hulle skaam is dat daar ‘n 3.0 liter enjin in die 340i is of 1.6 in die C220. Dis iets om te vier, om ‘n kleiner enjin se krag te behou of selfs te verhoog in vergelyking met die ouer model, is mos iets om op trots te wees?