Die Triumph Tiger 800 XCA: ʼn Uitstekende middelgewig

Die nuwe Triumph Tiger 800 XCA. Foto: Brian Cheyne

By die onlangse Motorfiets van die Jaar‑geleentheid het Lachlan Harris van AMID (Association of Motorcycle Importers and Distributors) nogal ʼn waar ding gesê. Hy is van mening dat baie mense wat nie die prys van die heel grootste avontuurfiets kan regverdig nie, nie eers ʼn kleiner fiets oorweeg nie.

Nadat ek die Triumph 800 XCA gery het, is ek van mening dat dit dalk die enigste avontuurfiets is wat jy ooit sal nodig hê.

Die XC‑reeks van Triumph is gemik op die avontuurryer wat bietjie verder van die teerpad af wil gaan as net die stofpaadjie tot by die plaasstalletjie. Ek het die top-model XCA onder hande gehad wat aan die begin van die jaar opgeknap is. Meer as 200 individuele komponente is verbeter en daar is selfs aan die ergonomie ook aandag gegee.

Ek gaan julle nie verveel met al 200 verbeteringe nie, maar wil wel die belangrikste uitlig.

Die enjin is steeds die 3 silinder 800cc‑enjin uit die vorige model, maar intern is ʼn paar komponente ligter gemaak en die enjin tol nou heelwat makliker deur die toere. Die enjin lewer 95 perdekrag en word deur ʼn elektroniese versneller beheer. Die eerste rat is verkort en dit maak die fiets makliker om te ry wanneer jy stadig ry – hetsy in die stad of op Sani-pas.

Die nuwe Triumph Tiger 800 XCA. Foto: Brian Cheyne

Die XCA het enjin beskerming as standaardtoerusting. Dit bestaan uit lywige pypwerk om die enjin en ʼn pensplaat om die onderkant van die enjin te beskerm. Ek het egter my bedenkinge oor die doeltreffendheid van laasgenoemde, want dit lyk maar dun en beskerm ook nie die onderkant van die agterste skokbreker nie.

Die voorwiel is 21” en dun. Hierdie kombinasie beloof goeie hantering op stofpaaie.

Die eerste aspek wat ek op die XCA sal verander, is die bande self. Die Bridgestone‑bande van die toetseenheid was nie ideaal vir rowwe paaie nie en was meer geskik vir alledaagse padgebruik. Die vering is ten volle verstelbare WP‑eenhede.

Soos met hierdie klas fietse, sit jy regop agter breë handvatsels. Die sitplek kan met ʼn eenvoudige stelsel opwaarts verstel word sonder om eers ʼn skroewedraaier te gebruik. Die windskerm het ʼn eenvoudige verstellingsmeganisme, en jy kan dit sommer so in die ry verstel. Daar is ekstra windwering langs die skerm en saam help dit om die wind mooi om die ryer te kry. Die handvatsels is ook nou nader aan die ryer geskuif wat skynbaar die hantering op lae spoed verbeter. Vir ons koue oggende het die XCA verwarmde handvatsels en sitplek.

Die nuwe Triumph Tiger 800 XCA. Foto: Brian Cheyne

Die volkleur TFT‑skerm is ʼn groot pluspunt van die nuwe Tiger. Hierdie skerm begin nou op meer en meer nuwe Triumphs verskyn en het baie omvattende inligting. Ek dink nie daar is iets uitgelaat nie, en daar is heelparty uitlegte om uit te kies. Alles is maklik om met ʼn skakelaar op die linkerhandvatsel te beheer.

Op die pad is die 800 ʼn baie beleefde reisgenoot. Die kraglewering is glad, en selfs in sesde rat is daar nog oorgenoeg krag sou jy skielik moet versnel. As die paaie rowwer raak, kan jy gemaklik op die Tiger staan. Die metaal voetrusse is breed en is heel gemaklik. Die Tiger druk die skaal net so aks oor 200 kg, en voel lig en rats. Ná ʼn lang dag in die saal op verskeie oppervlakke kon ek regtig nie kla oor die gemak van die XCA nie.

In my beskeie opinie kon ek regtig geen rede sien hoekom ek die 1200 sou oorweeg nie. Miskien as ek met twee op en ʼn week se bagasie êrens heen wou ry, sal die 1200 dalk help, maar andersins is die Triumph Tiger 800 XCA meer as genoeg, dankie.

Produkblad: https://www.triumph-motorcycles.co.za/bikes/adventure/tiger-800

Die feite: