[Foto’s] Die Taiwanese pendeltuig

Die Taiwanese SYM MAXSYM 600i ABS (Foto: Brian Cheyne)

Dit is eintlik ’n jammerte dat die Afrikaanse vertaling vir die woord “scooter” “bromponie” is. Die bromponie begin sommer al op die agtervoet met so ’n benaming. En tog, in die Taiwanese stad Kaohsiung ry amper 70% van die inwoners bromponies.

Suid-Afrika het die Gautrein tussen Pretoria en Johannesburg ingestel om te kyk of hulle die las op die N1 kan verlig, maar nie rekening gehou met ons land se mense nie. Ons bly maar geheg aan ons motors. Baie van hierdie pendelaars werk binne ’n paar kilometer van ’n Gautrein-stasie, maar weier volstrek om trein te ry omdat hulle nie onafhanklikheid wil inboet nie.

Ek pendel nou al vir amper drie jaar tussen die Marlboro-stasie en my kantoor. ’n Afstand van 6 km. Daarvoor het ek ’n goedkoop bromponie aangeskaf en binne 18 maande al die koste wat ek aan ’n bussie moes bestee, verhaal. Ja, party dae reën dit, en vir so twee maande van die jaar is dit bitter koud, maar dit alles kan nie afbreuk doen aan die vryheid van beweging wat die bromponie bring nie. Ek kan ry as ek klaar gewerk het; nie as die bussie vertrek nie. En die beste van alles: Ek sit nie op die N1 nie. Bromponies is net so moeitevry! Bromponies hoef ook nie pap in die broek te wees nie. Neem nou maar die Taiwanese SYM MAXSYM 600i ABS.

Die Taiwanese SYM MAXSYM 600i ABS (Foto: Brian Cheyne)

In hierdie prysklas het kopers die keuse van ’n verskeidenheid van baie goeie motorfietse, so die MAXSYM moet regtig iets besonders na die tafel bring om dit ’n aantreklike opsie te maak. As jy opklim, voel jy of jy in jou gunstelingleunstoel gaan sit. Die sitplek is breed met ’n verstelbare rugstut. Die handvatsels voel bietjie na aan my, maar dit is eers as jy beweeg en jou voete voor teen die fiets vasskop dat die posisie sinmaak. Voorlangs is twee klein paneelkissies vir los goedjies en onder is daar ’n sluitbare paneelkissie wat toegerus is met ’n 12v-prop en selfs ’n USB-poort, sodat jy jou foon sommer so in die ry kan laai.

Onder die sitplek is ’n yslike stoorplek – groot genoeg vir twee volgrote pletterpette. En hier is dit waar bromponies veral skitter: Dit is ’n praktiese vervoermiddel, met waterdigte pakplek vir jou kosblik en werktassie. As jy êrens stop, kan jy alles veilig wegsluit en hoef jy nie met jou bonkige motorfietsbaadjie die winkels in te gaan nie.

Die instrumentpaneel is baie elegant en lyk of dit uit ’n luukse motor kom. Remme is ABS-eenhede met dubbelskywe voor en ’n enkelskyfrem agter. Met sy groot kapasiteit enjin trek die SYM maklik onder die verkeer uit en behoort hy jou daaglikse pendelrit baie maklik te maak.

Die Taiwanese SYM MAXSYM 600i ABS (Foto: Brian Cheyne)

Die SYM is in my opinie ’n baie praktiese opsie waarmee ek elke dag sal kan saamleef. Dis kragtig genoeg vir ’n passasier, en het genoeg pakplek vir ’n vinnige naweek weg. My passasier het ook met lof gepraat van die agterste gestoelte(s). Ek kan met redelike sekerheid sê dat ek maklik ’n langer rit ook sal aanpak met die SYM.

Dit is regtig jammer dat daar so ’n stigma kleef aan bromponies, so asof dit net gemaak word vir vroulike studente. Die MAXSYM maak soveel ekonomiese sin. Gaan loer dus maar in by ’n SYM-handelaar en kyk watter een vir jou sal werk.

Vir meer inligting, besoek die produkblad.

In ’n neutedop: