ʼn Lekker suksesverhaal is vir almal lekker. Egskeidings val gewoonlik nie in hierdie klas nie … behalwe die een tussen Ford en Mazda in Suid-Afrika. Mazda is soos die afgeskeepte stiefkind behandel en ná jare se gesukkel het Japan gesê: “Tot hier toe en nie verder nie!”
Sedert Mazda se bevryding het hulle nog net reuse-sukses behaal. Hulle klop die afgelope drie jaar telkens hul doelwitte in Suid-Afrika. Hulle het ʼn indrukwekkende produkreeks en dié 2.2DE pas mooi op die boonste rang van die CX5-leer.
Die CX-5 het ʼn mooi ontwerp en volg soos alle ander Mazdas die KODO-ontwerpstyl. Daar is verskeie opknappings aan die reeks om ʼn meer aggressiewe voorkoms te bied. Hoewel die CX-5 taai lyk het hy steeds sagte lyne en sal nie die kinders huilend laat weghol nie.
Die binneruim is waar die CX-5 my regtig beïndruk. ʼn Pragtige skoon en ergonomiese uitleg maak dié kajuit ʼn rustige plek om te sit. Dit word dan nog verbeter deur al die luukshede wat in dié CX-5 beskikbaar is. Elektries verstelbare sitplek, spoed- en klimaatbeheer, Bluetooth, outomatiese ligte, ruitveërs en handrem, baanbeheer en dan die gewone ABS en ʼn magdom lugsakke. My gunsteling-funksie in al die Mazdas is die inligtingstelsel. Die navigasie, radio en verskeie ander funksies word almal met die draai knoppie langs die handrem beheer. Dit is uiters intuïtief en maklik om te gebruik. Nog ʼn funksie in die CX-5 wat baie lekker werk is die kattebak se seiltjie wat vas is aan die kattebakdeur en as jy die kattebak oopmaak gaan die seiltjie met die deur op, baie slim. Al wat effe pla is dat die CX-5 bietjie knapper voel as sy mededingers in dié klas.
Die enjin en ratkas werk lekker saam. Die 2,2 viersilinder dieselenjin stoot ʼn indrukwekkende 129 kW en 420 Nm. Die sesgang- outomatiese ratkas maak gou werk van die krag en die allewielaandrywingstelsel verseker dat die CX-5 altyd lekker vastrap. Mazda se nuwe generasie dieselenjins werk regtig lekker en vanweë ʼn laer drukverhouding loop hulle indrukwekkend stil en hou baie meer van omwentelinge as ouer diesel enjins.
Die ritgehalte is gemaklik en soepel sonder enige onaardige bakrol. Lang reise sal nie in die CX-5 ʼn probleem wees terwyl jy Suid-Afrika van hoek tot kant deurkruis nie. Met die sekerheid wat die allewielaandrywing bied sal jy meeste grondpaaie in die land kan aandurf. Solank jy nie wilde hindernisse teëkom nie sal jy piekfyn wees. Die CX-5 kan ook ʼn stewige 1,5 ton sleep.
Daar loods egter binne etlike dae ʼn splinternuwe CX-5. Ons wag ons beurt af, maar in die tussentyd – as daar ʼn winskoop op ʼn huidige CX-5 oor jou pad kom, sou ek nie huiwer nie.
Die reeks lyk so:
CX-5 2.0 Active | 121 kW/ 210 Nm | 6,4 ℓ/100 km | R369 400 |
CX-5 2.0 Active outo | 121 kW/ 210 Nm | 6,4 ℓ/100 km | R381 100 |
CX-5 2.0 Dynamic | 121 kW/ 210 Nm | 6,4 ℓ/100 km | R383 400 |
CX-5 2.2DE Active | 110 kW/ 380 Nm | 5,7 ℓ/100 km | R440 100 |
CX-5 2.5 Individual | 141 kW/ 256 Nm | 6,9 ℓ/100 km | R475 300 |
CX-5 2.2DE AWD Akera | 129 kW/ 420 Nm | 5,9 ℓ/100 km | R541 400 |
Die kompetisie lyk só:
Ford Kuga 2.0TDCi AWD Titanium | 132 kW/ 400 Nm | 6,2 ℓ/100 km | 4 jaar/ 120 000 km waarborg 5 jaar/ 90 000 km diensplan | R543 900 |
Toyota Rav4 2.2D-4D AWD VX | 110 kW/ 340 Nm | 6,5 ℓ/100 km | 3 jaar/ 100 000 km waarborg 5 jaar/ 90 000 km diensplan | R549 700 |
Volkswagen Tiguan 2.0TDI 4 Motion Highline | 130 kW/ 380 Nm | 6,4 ℓ/100 km | 3 jaar/ 120 000 km waarborg 5 jaar/ 90 000 km diensplan | R558 300 |
Kia Sportage 2.0CRDi SX AWD | 130 kW/ 400 Nm | 6,8 ℓ/100 km | 5 jaar/ onbeperkte km waarborg 5 jaar/ 90 000 km diensplan | R567 995 |
zoem zoem bo!