Die Kia Seltos.
Kia het vir die sesde agtereenvolgende jaar al die ander vervaardigers uitgestof om die nommereen-posisie in die jaarlikse JD Power se aanvanklike gehaltestudie in die VSA te vat.
Kia sit nou met die meeste JD Power-toekennings van enige vervaardiger vir die tweede agtereenvolgende jaar. Wat beteken dit? Dit wys dat Kia-eienaars in die VSA minder probleme aangemeld het in die eerste 90 dae van eienaarskap van enige ander vervaardiger.
Kia het onlangs in Korea sy vierdegenerasie- Kia Carnival, of Sedona soos ons hom ken, gewys. Besonderhede oor enjins en spesifikasies vir die Suid-Afrikaanse model is nog duister – maar ons kan darem al sien hoe hy gaan lyk.
Die Kia Sedona.
Die Kia Sedona word tans deur Kia se lieflike 2.2-CRDi-dieselenjin en ʼn agtspoed-wringkragomsitter- outomatiese ratkas aangedryf. Die enjin bied 147 kW en 440 Nm. Die Grand Sedona is voorwaar ʼn lieflike gesinsvoertuig. Ons verwag die nuwe vierdegenerasie-Sedona laat in 2021 in Suid-Afrika.
Ons het onlangs berig oor Kia se nuwe Seltos wat reeds in Suid-Afrika beskikbaar is. Kia het vandag ʼn dieselweergawe van die Seltos beskikbaar gestel. Die Seltos word aangedryf deur ʼn 1.5-viersilinderturbodieselenjin wat 86 kW en 250 Nm bied. Daar is ʼn handrat én twee outomatiese weergawes beskikbaar.
Die reeks lyk nou só:
| Kia Seltos 1.6 EX handrat | R380 995 |
| Kia Seltos 1.6 EX outo | R398 995 |
| Kia Seltos 1.5 CRDI EX handrat | R410 995 |
| Kia Seltos 1.5 CRDI EX outo | R428 995 |
| Kia Seltos 1.6 EX+ outo | R416 995 |
| Kia Seltos 1.5 CRDI EX+ outo | R446 995 |
| Kia Seltos 1.4 T-FDi GT-Line | R471 995 |
Die reeks word gedek deur ʼn 5 jaar/onbeperkte km-waarborg en 5 jaar/90 000 km-diensplan.
