Die tydskrif Leisure Wheels het onlangs sy bakkie van die jaar aangewys.
Die Volkswagen Amarok V6 TDI 4Motion het met die louere weggery.
Ek wil in die artikel egter fokus op die skokkende ontdekking waarop daar in die proses afgekom is, naamlik dat bakkies nie die gewig mag dra wat die vervaardigers sê dit kan nie. Wat meer skrikwekkend is, is dat die bakkie wat almal sê die taaiste werkesel is, inderwaarheid die minste kan dra.
Leisure Wheels het elke bakkie gevat en dit met ʼn vol tenk brandstof en dieselfde bestuurder geweeg. Dit is gebruik as die tarragewig (die leë gewig van die voertuig). Dié gewig is dan van die voertuig se geregistreerde bruto voertuigmassa (BVM) afgetrek en siedaar – die verskil is die gewig wat jou bakkie wettig mag dra.
Die skoksyfers lyk só:
Bakkie | Tarragewig | BVM | Verskil |
Toyota Land Cruiser | 2 710 kg | 3 300 kg | 590 kg |
Ford Raptor | 2 500 kg | 3 090 kg | 590 kg |
Toyota Hilux | 2 270 kg | 2 910 kg | 640 kg |
Mitsubishi Triton | 2 150 kg | 2 880 kg | 730 kg |
Mercedes-Benz X-klas | 2 500 kg | 3 250 kg | 750 kg |
Nissan Navara | 2 160 kg | 2 910 kg | 750 kg |
Ford Ranger Wildtrak | 2 330 kg | 3 090 kg | 760 kg |
VW Amarok | 2 310 kg | 3 080 kg | 770 kg |
Isuzu D-Max | 2 250 kg | 3 100 kg | 850 kg |
Mahindra Pik Up | 2 210 kg | 3 150 kg | 940 kg |
Suid-Afrikaners ken dié tipe bakkies as ʼn sogenaamde eenton-bakkie. Jy is dus onder die indruk dat jy ʼn ton op jou bakkie mag laai, én volgens die vervaardiger mag jy, maar beslis nie volgens wet nie.
Leisure Wheels het bevind die Toyota Land Cruiser kan die minste dra, terwyl die Mahindra Pik Up die meeste kan dra. Ja, jou bakkie kan beslis baie meer hanteer, maar sou ʼn verkeersbeampte jou aftrek en weegbrug toe neem, is daar perde.
Terug by die bakkie van die jaar-kompetisie. Die manne by Leisure Wheels het ʼn klomp ander faktore in ag geneem soos om die onderdele-mandjie te vergelyk wat deur die Kinsey-verslag bymekaar gemaak word. Die goedkoopste bakkie om te onderhou is dus die Isuzu D-Max met ʼn totale mandjie van R62 578… en dan kom die skoksyfer weer: Die Triton se mandjie is R202 111!
Daar is ook somme gemaak oor krag-tot-gewig-verhouding… die wenner is VW se V6 Amarok met 70,69 kW per ton – dit is hoekom hy blitsbuksies in die verkeer pak gee, en die verloorder met ʼn allemintige marge is Toyota se Cruiser met 37,64 kW per ton.
Die toetse en ontledings wat die Leisure Wheels-span gedoen het, is puik werk. Gʼn koper sal al hierdie inligting bymekaar kan maak nie.
Die tydskrif wat ʼn diepgaande verslag hieroor sal bevat, is vanaf Maandag 17 Februarie beskikbaar. Lees meer oor die kompetisie hier.
Ek wonder tog hoe kan mens nou n V6 Amarok vergeluik met die gewone ander bakkies, ek meen tog daar is n groot verskil in die engine, krag, spoed ?
Presies, vergelyk appels met appels, nie appels met pere nie.
Ons het bietjie meer as ‘n jaar terug vir ons ‘n gebruikte Amarok gekoop nadat ons na al die vervaardigers se produkte gekyk het. Daar is nie fout met die ander produkte, die Amarok beskik oor die eienskappe wat vir my belangrik is. Ons ry so bietjie grond paaie, heelwat bergpasse en dan partykeer die snelweg. Brandstof verbruik is puik, daar is genoeg krag, puik handtering en lekker ry gerief op teer en grondpaaie. Na my mening word die meerderheid dubbel kajuit bakkies vir min of meer dieselfde doel aangewend, daar is selfs sulke bakkies wat nog nie eers op ‘n grondpad gery het.
Lekker ry!
Ek is baie happy met my Fiat Fullback 2.5D. Ek kry in die stad 11.1km/l en oop pad tussen 13.5 en 14.5 km/l afhangende vd omstandighede. Ek laai elke naweek twee KTM’s agter op. Dan ook gazebos en toerusting. Dis ‘n 4×2 en ons is gereeld op die grondpaaie. Hy is verseker ‘tough enough’. Ek het hom in 2018 nuut vir ongeveer 133000 minder as die Toyota’s’, Amaroks, Nissans ens gekoop. So ja…dis wel n Mitsubishi…maar hoeveel Dakars het hulle nie gewen nie! Goeie samewerking tussen Fiat en Mitshubishi!
Die bakkie wat die minste verkoop wen die prys
@ Shady. Ek het dieselfde gedagte gehad. As die Amarok so goed is (en ek sê geensins dit is sleg nie) hoekom sukkel Volkswagen so om hulle van die vertoonlokaal se vloer af te kry? Dit is sekerlik ‘n baie lekker sport nuts voertuig vir die stads bewoner maar ek dink die Hilux se sterk punt is dat hy amper net so goed is as sportnuts maar beter is as ‘n plaas en mynbakkie.
Ek sal dieselfde toets en vergelykings met enkel kajuit bakkies wil sien. Want ek koop defnitief nie n dubbel kajuit as n werksesel nie.