Langpad word ʼn kortpad in dié weeldewa

Toyota se nuwe Quantum VX. Foto: Verskaf

Toyota se Quantum VX is ʼn uiters luukse bus en ons het die langpad Suidkus toe van Pretoria af met hom aangepak.

Ek het drie kinders, onderskeidelik ses, agt en 10 jaar oud, en hulle reis baie lekker en gemaklik sonder te veel foefies óf pa wat moet sê: “As ek die kar stop!” Al reis my kinders maklik kan dit altyd gemakliker gaan. Dink aan ʼn besigheidsklasvlugkaartjie teenoor ekonomie.

Die Quantum VX is ʼn volbloed-weeldewa waar die tweede ry se sitplekke elektries verstelbaar is, met sitplekverwarmers én ʼn voetrus wat uitskop.

Toyota se nuwe Quantum VX. Foto: Verskaf

Natuurlik wou die oudste, die gadget-kind, daar sit. Sussie moet ook daar sit sodat mamma by die jongste kan uitkom vanuit die passasiersitplek. Die middelboetie is net te bly om in die derde ry alleen te sit met sy foon en ʼn USB-laaipoort reg langs hom. Saligheid.

Namate die vakansie nader skuif, begin ek wonder en oorweeg of ek ʼn waentjie gaan sleep of nie. Dis ʼn pyn as dit nie heeltemal nodig is nie, én ek moet ʼn pel se waentjie dan leen. En mens weet wat sê baie mense oor leen!

Toyota se nuwe Quantum VX. Foto: Verskaf

Die probleem is dat die vierde ry sitplekke in die Quantum nie uitgehaal kan word nie. Die sitvlak vou op – maar verder vat dit nog ʼn groot gedeelte van die bagasiebak. Die ander probleem is onkunde. Ek sukkel my roer af om die sitplekke vorentoe en agtertoe te skuif – daar is sulke gidse wat die sitplekke stop.

Wel – gelukkig wys die gadget-kind vir my dat die goedjies net uithaal – dan kan mens die sitplekke afsonderlik skuif soos mens wil. Ek gaan vroetel toe vir 20 minute buite rond en vind ʼn oplossing vir die week se bagasie sonder dat ons ʼn waentjie moet sleep. Indien ek ʼn waentjie van my eie gehad het, sou ek dit net gesleep het – dis minder moeite.

Toyota se nuwe Quantum VX. Foto: Verskaf

Die vyf van ons vat die pad, sak en pak Margate toe. Ons kry huisvriende daar – hulle is vier. Dán is daar presies genoeg plek vir die nege van ons. Die Quantum maak my aanvanklik bang met sy brandstofverbruik – maar sodra Gauteng se bulte in die truspieëltjie is, kom dit af. Ek maak vol in Harrismith en die bussie vat so by die 37 ℓ. Die rekenaartjie sê ook ons kry so 9.4 ℓ/100 km gemiddeld – en die wind het lelik gewaai.

Toyota se nuwe Quantum VX. Foto: Verskaf

Ná Harrismith is die eerste stop eers weer in Cato Ridge by die groot Engen net voor die N2 wegbreek Suidkus toe. Bergpas op en af het die Quantum nie ʼn voet verkeerd gesit nie. Die padhouvermoë is vir my opvallend. Ja – dit is ʼn groot, breë bus – maar hy hanteer gemaklik. So agt uur later kom ons in Margate aan. Die gemiddelde brandstofverbruiksyfer wys net hier by 9.2 ℓ/ 100 km … maar die lekkerste van alles is niemand is moeg nie. Niemand het lyfseer nie. Almal is vriendelik met mekaar. Dis net ʼn bus wat dit kan doen.

Toyota se nuwe Quantum VX. Foto: Verskaf

Vir die volgende week rits ons nege op en af teen die Suidkus in die gietende reën. Ons het elke strand besoek en almal wat verbystap, fluister iets oor die bus. Die langpad terug huis toe is ook in ʼn japtrap verby, sonder enige probleme. Die brandstofverbruik klim na 10.4 ℓ/ 100 km, want sussie het iewers nét ná ʼn vulstasie ʼn nood ontdek – toe moes ek maak asof ek ʼn Ferrari-bus ry en ʼn badkamer kry.

Soos ons die bus by die huis afpak, is dit die vreemdste gevoel. Mens is hartseer dat hy teruggaan. Nie omdat dit ʼn asemrowende sportmotor is nie, maar eerder omdat dit deel word van die gesin. Mens raak lief vir ʼn bus, want dit maak jou gesin gelukkig, en daar is bitter min voertuie wat dit kan doen.

Die reeks lyk só:

Die reeks word gedek deur ʼn 3 jaar/100 000 km-waarborg en 90 000 km-diensplan.

Die kompetisie lyk só:

Tussen die mededingers is die Hyundai H1 nie werklik baie luuks nie – maar beslis ʼn winskoop. As mens die Quantum in gedagte hou, is nie eens die Mercedes-Benz luuks genoeg nie. As mens ʼn luukse bus wil hê, is die Quantum puik … As mens net ʼn gesinsbus wil hê, is die H1 steeds my keuse.