Lexus se nuwe IS-sportsedan ‘belowend’

(Foto: Verskaf)

Lexus het so pas sy nuutste IS-sportsedan digitaal aan die wêreld gewys. Oor die jare heen het Lexus al vir hom ŉ nis uitgekerf tussen die vier ander luukse handelsmerke in Suid-Afrika. Die IS se direkte mededingers is Audi se A4, BMW se 3-reeks, Jaguar se XE en Mercedes-Benz se C-klas. Ongelukkig kry ons nie meer ŉ Volvo S60 in Suid-Afrika nie.

Lexus was nog nooit die sportiefste van dié mededingers nie, maar Lexus se vakmanne bly getrou aan hul visie. Die nuwe IS sal in die VSA met ŉ 3.5 V6-petrolenjin en agterwielaandrywing so wel as vierwielaandrywing beskikbaar wees vir die kouer klimaatstoestande waar sneeu ŉ uitdaging is.

Die F-Sport‑weergawe het ŉ pakket beskikbaar met spesiale vering, liggewig wiele en ŉ beperkte glip-agterewenaar. Dit is alles bestanddele vir ŉ fantastiese ervaring. Dis egter in die binneruim waar Lexus my betower. Die meeste Lexus-voertuie se kajuit pas soos ŉ handskoen. Die materiale is voortreflik en die bougehalte eersteklas. Dan praat ons nie eers van die Mark Levinson-klankstelsel wat amper ongeëwenaard is nie.

Lexus Suid-Afrika beoog om die IS vroeg in 2021 bekend te stel, en kon nie nou die spesifikasies bevestig nie. As ek moet bespiegel, glo ek daar sal ŉ 2.0-viersilinderturbo-model wees, ŉ hibridiese model en dan die reeksleidende 350 met ŉ V6-petrolenjin.

Die Lexus onderneem om uitnemend te presteer in die afdeling vir padhouvermoë, te danke aan hul spoggerige nuwe Toyota Technical Centre Shimoyama. Hulle sal ŉ totaal van ¥300 biljoen belê in dié sentrum, en dit is waar van Toyota en Lexus se navorsing en ontwikkeling plaasvind. Op die 5,2 km-baan kan ingenieurs ŉ voertuig verfyn tot hy perfek is.

Ek sien daarna uit om in 2021 die nuwe Lexus IS plaaslik te toetsbestuur.