Die eerste kruismodel wat ek ooit onder hande gehad het, was Nissan se eerste Qashqai omtrent 12 jaar gelede, naamlik ʼn 2.0-viersilinderturbodiesel met 110 kW en ek onthou dat ek tóé al gewonder het hoekom enigiemand ʼn kruismodel sou koop – dis net ʼn luikrug met hoër vering.
Spring tot in 2020 en ek moet bieg dat ek steeds presies dieselfde voel. Die Qashqai ís inderdaad gewild en mense koop dit. Die nuwe Qashqai se ontwerp is vir my werklik mooi en die stuurwiel een van die bestes tans op die mark, maar dié spesifieke Qashqai word deur sy enjin en ratkas teleurgestel.
Die Nissan Qashqai 1.2T Midnite het ʼn 1.2-viersilinderturbopetrolenjin met 85 kW en 165 Nm wringkrag. Dít gepaard met ʼn palwisseltransmissie (CVT) is ʼn resep vir ʼn ramp. Ek sou sê dat dié CVT beslis een van die beter palwisselratkaste is wat ek onder hande gehad het, maar die 1.2’tjie met dié groot bakwerk sukkel om die mas op te kom.
Die binneruim bied sitplek vir vyf in redelike gemak en die kattebak is teen 430 ℓ nie te versmaai nie. Verder het die binneruim ʼn sterk spesifikasievlak met klimaat- en spoedbeheer, outomatiese ligte en ruitveërs, Apple CarPlay en Android Auto. Heel goed.
Aan die veiligheidskant is daar ABS met EBD, vastrap- en stabiliteitsbeheer en ses lugsakke. Dit is goed, al sou ek stry dat die vastrapbeheer met hierdie flou enjin nooit gebruik gaan word nie. Op die pad toer die Midnite sag genoeg en die rit is heel billik. Die groot spieëls bied ʼn puik aangesig van wat agter die voertuig aangaan, maar dit veroorsaak heelwat windgeraas.
Dit is maklik om die Qashqai op te som.
Dit is ʼn billike gesinsbuksie as verrigting nié vir jou belangrik is nie, maar sy prys is wild.
ʼn Doodgewone luikrug soos VW se Golf 1.0 TSI Trendline-handrat bied dieselfde ruimte, maar ʼn baie beter rit en verrigting teen ʼn reusebesparing. As ʼn mens die kruismodel wil hê vir die grondvryhoogte, koop dan ʼn Renault Duster 4×4 óf Techroad-outo vir R120 000 minder.
Die reeks lyk só:
Nissan Qashqai 1.2T Visia | 85 kW/190 Nm | 6.2 ℓ/100 km | R408 400 |
Nissan Qashqai 1.2T Acenta | 85 kW/190 Nm | 6.2 ℓ/100 km | R440 200 |
Nissan Qashqai 1.2T Acenta outo | 85 kW/165 Nm | 6.2 ℓ/100 km | R461 300 |
Nissan Qashqai 1.2T Midnight Edition | 85 kW/165 Nm | 6.2 ℓ/100 km | R480 800 |
Nissan Qashqai 1.5dCi Acenta Plus | 81 kW/260 Nm | 4.2 ℓ/100 km | R492 400 |
Nissan Qashqai 1.2T Tekna | 85 kW/165 Nm | 6.2 ℓ/100 km | R508 400 |
Die reeks word gedek deur ʼn 6 jaar/150 000 km-waarborg en 3 jaar/90 000 km-diensplan.
Die mededinging lyk só:
Volkswagen Golf 1.0TSI Trendline | 81 kW/200 Nm | 4.8 ℓ/100 km | 3 jaar/120 000 km- waarborg 5 jaar/90 000 km- diensplan | R344 100 |
Renault Duster 1.5dCi TechRoad outo | 80 kW/250 Nm | 4.8 ℓ/100 km | 5 jaar/150 000 km- waarborg 3 jaar/45 000 km- diensplan | R361 900 |
Hyundai Creta 1.6 Executive Limited Edition outo | 90 kW/150 Nm | 8.4 ℓ/100 km | 5 jaar/150 000 km- voertuigwaarborg 7 jaar/200 000 km- dryfstelselwaarborg 5 jaar/90 000 km- diensplan | R408 500 |
Hyundai Kona 1.0T Executive | 88 kW/172 Nm | 6.8 ℓ/100 km | 5 jaar/150 000 km- voertuigwaarborg 7 jaar/200 000 km- dryfstelselwaarborg 5 jaar/90 000 km- diensplan | R414 900 |
Toyota Corolla 2.0 XR | 125 kW/200 Nm | 6.5 ℓ/100 km | 3 jaar/100 000 km- waarborg 6-dienste-diensplan | R420 500 |
Suzuki Vitara 1.4T GLX outo | 103 kW/220 Nm | 5.9 ℓ/100 km | 5 jaar/200 000 km- waarborg 4 jaar/60 000 km- diensplan | R426 900 |
Ford Kuga 1.5T Ambiente | 110 kW/240 Nm | 6.2 ℓ/100 km | 4 jaar/120 000 km- waarborg 6 jaar/90 000 km- diensplan | R433 500 |
Toyota Rav4 2.0 GX | 127 kW/203 Nm | 6.8 ℓ/100 km | 3 jaar/100 000 km- waarborg 6-dienste-diensplan | R454 500 |
Ek het spesifiek hier ʼn paar mededingers – soos die Golf en die Corolla – bygevoeg wat nie regstreeks met die Qashqai meeding nie.
Dáái twee karre is amper perfek, een ʼn luikrug en die ander ʼn sedan – albei vir ʼn reusebesparing teenoor die Qashqai.
Indien die begroting knap is, bly die Duster my keuse. Boaan dié prysklas is die Rav4 en Kuga albei puik – maar die grootste verrassing kom by die Vitara. Die 1.4-Turbo trek puik, én dit is baie lig op brandstof – vir ʼn R54 000-besparing oor die Qashqai.
In die prysklas kan ʼn mens amper enigiets koop – gaan ry hulle almal net eers.
Jou syfers op die 2L diesel is verkeerd, dit is 110kw nie 103 nie, ek ry enige tyd hierdie Qashqai voor ek enige van daai ander stukke goed ry, weereens word Nissan se voertuie afgeskied deur mense wat bevooroordeeld is, los Nissans uit dis uitstekende voertuie
Dagsê Harry
Baie dankie vir jou kommentaar. Jy is inderdaad reg, dit was 110 kW. Jammer vir die oorsig. Die artikel is reeds gewysig.
Groetnis
Brendon
nms Maroela Media