Ontwerp, waar die Franse uitblink

Foto: Verskaf

Die Franse het nog altyd ʼn neiging gehad vir ontwerp. Styl bó funksie.

Nie dat die funksionaliteit nie daar was nie – maar dit moes ʼn uitdaging bied vir die konvensionele. Hoekom moet rigtingwysers op stokkies langs die stuurwiel wees? Hoekom kan dit nie ʼn knoppie op die paneelbord wees soos in die Citroën DS nie?

Baie mense is onbewus van die feit dat Citroën een van die oudste motorhandelsmerke is en vanjaar 101 word. En met hul absoluut kleurryke geskiedenis het hulle nou ʼn naam om te behou. Die C5 Aircross is nie laf nie – maar mens kan hom beslis uitken in ʼn see vol sportnutsvoertuie.

Foto: Verskaf

Nóg ʼn reusepluspunt vir my is die feit dat Citroën met die C5 Aircross getrou bly aan ʼn óú Citroën-kenmerk – asemrowend sagte vering. In ʼn tyd waar alles reusewiele en klipharde vering het om vinniger om die Nordschleife te gaan, sê Citroën eenvoudig – nee dankie, ons motors was nog altyd uiters gemaklik.

Die C5 Aircross word aangedryf deur die groep se 1.6-viersilinderturbopetrolenjin. Die enjin bied 121 kW en 240 Nm. Heel voldoende vir dié soort voertuig.

Foto: Verskaf

Ek is gek na ʼn Franse diesel, ek het al vyf besit en dink hulle is van die bestes op die mark. Ongelukkig is die einde van die diesel naby, so ʼn turbopetrol sal maar moet doen.

Die binneruim van die C5 Aircross is baie luuks en uiters modieus. Die ontwerp op die sitplekke pas by die ontwerp van die paneelbord. Die digitale instrumente en inligtingstelsel bied jou elke denkbare brokkie inligting wat jy moontlik sou wou weet. Al die luukshede is daar, van elektriese sitplekke, CarPlay en Android Auto, kop op vertoon (HUD), spoed en klimaatbeheer – de lot.

Foto: Verskaf

Die ritgehalte in die C5 Aircross is klasleidend. Dit is uiters soepel en sag, sonder om verskriklike bakrol te toon. Padhouvermoë is voldoende vir dié grootte sportnutsvoertuig.

Die Citroën C5 Aircross is maklik om op te som. Dit is ʼn pragtige motor met ʼn modieuse ontwerp. Die binneruim is lieflik en die enjin heel goed. Die ratkas is ongelukkig vir my nie fantasties nie – veral in ʼn wêreld waar 8-spoed-outoratkaste en dubbelkoppelaar-ratkaste deesdae puik is. Waar die Citroën volkome sin maak, is die feit dat die voertuie uiters veilig is, en baie uniek en ongewild – so die diefstal en kapingrisiko is bitter laag. Nou moet hulle net in die land bly, want die herverkoopwaardes kan nie nóg ʼn hou weerstaan nie.

Die reeks lyk só:

Citroën C5 Aircross 1.6T FeelR474 900
Citroën C5 Aircross 1.6T ShineR514 900

Die kompetisie lyk só:

Ford Kuga 1.5T Ambiente auto132 kW/240 Nm6.9 ℓ/100 km4 jaar/120 000 km-waarborg

6 jaar/90 000 km- diensplan

R425 000
Renault Koleos 2.5 Dynamique 4WD126 kW/233 Nm8.3 ℓ/100 km5 jaar/150 000 km- waarborg

5 jaar/90 000 km- diensplan

R499 900
Mitsubishi Outlander 2.4 GLS123 kW/222 Nm8.2 ℓ/100 km3 jaar/100 000 km- waarborg

5 jaar/90 000 km- diensplan

R499 995
Kia Sportage 2.0CRDi EX Plus131 kW/400 Nm6.2 ℓ/100 km5 jaar/onbeperkte km-waarborg

5 jaar/90 000 km- diensplan

R577 995
Volkswagen Tiguan 2.0TSI 4Motion Highline162 kW/350 Nm7.8 ℓ/100 km3 jaar/120 000 km- waarborg

5 jaar/90 000 km- diensplan

R601 400
Mazda CX-5 2.2DE AWD Akera140 kW/450 Nm5.7 ℓ/100 km3 jaar/onbeperkte km-waarborg

3 jaar/onbeperkte km-diensplan

R605 400
Toyota Rav4 2.5 AWD VX152 kW/243 Nm7.3 ℓ/100 km3 jaar/100 000 km- waarborg

6-dienstediensplan

R618 400
Hyundai Tucson 1.6T Elite Sport150 kW/300 Nm8.5 ℓ/100 km5 jaar/150 000 km- voertuigwaarborg

7 jaar/200 000 km- dryfstelselwaarborg

5 jaar/90 000 km- diensplan

R664 900
Honda CR-V 1.5T Exlclusive AWD140 kW/240 Nm7.0 ℓ/100 km5 jaar/200 000 km- waarborg

5 jaar/90 000 km- diensplan

R685 400

Die mark is enorm hier. Die Honda en Hyundai val uit die bus met daai pryse. Die res is goeie opsies. Die Ford Kuga is ʼn ware winskoop. Gaan ry dié wat in jou begroting pas … een sal die lekkerste wees vir jou.

Foto: Verskaf

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

1 Kommentaar

jongste oudste gewildste
Gato

Hy mag mooi wees en lekker ry maar ek sal dit vir verskeie redes nie koop nie. Herverkoop waarde is die heel grootste rede.