Padtoets: Dié BMW ʼn sakeman se droom

Die nuwe BMW 540i (Foto: BMW)

BMW se 5-reeks is oor die jare sinoniem met suksesvolle sakemanne. Die eerste weergawe, die E12, was uiters gewild in Suid-Afrika. Ons het die E12 vir ʼn verdere drie jaar gebou nadat Europa al die E28 gekry het. My oom het ʼn rooi E12 gehad, en toe ʼn blou E12-facelift.

Ek’t in my tienerjare heeltemal halsoorkop verlief geraak op ʼn familievriend se E28 M535i. Hy was donkergrys met die Bilstein-skokbrekers wat die M so effe laer gemaak het as die standaard E28. Die klankbaan van dié 3.4-sessilinderenjin was asemrowend.

In my twintigs het ek by ʼn BMW-handelaar in die Kaap die geleentheid gekry om die E60 V10 M5 te proe. Dit het my hele wêreld omgekrap, en my wanindruk van wat vinnig is sommer gou in perspektief gesit.

Die nuwe BMW 540i (Foto: BMW)

Dit bring my by die huidige G30 540i. Wat BMW tans doen, en wat my bly maak, is die feit dat BMW nie al hul fokus op turboaangejaagde viersilinderpetrolenjins plaas nie. Die nuwe 40i-enjin is ʼn lieflike 3.0, turboaangejaagde sessilinder. Hy bied 250 kW en 450 Nm. Dit is wel nie die volle prentjie nie. Hy bied 450 Nm tussen 1 380 r/min en 5 200 r/min. Jy sal sukkel om ʼn breër wringkragkurwe te kry. Die ander punt is dat hy sy 250 kW handhaaf vir 1 000 r/min tussen 5 500 en 6 500 r/min. Dit gee die 5-reeks ʼn angstige gevoel na 5 000 r/min. Dit is verslawend.

Die nuwe 5-reeks is ʼn bitter mooi ontwerp. Paneelgapings is piepklein, en niks lyk uit plek uit nie. Die binneruim is tóg waar dié BMW beïndruk. Die sitplekke is lieflik en bied perfekte steun. Dit is elektries verstelbaar sodat jy dit kan stel nes jy dit wil hê. Die stuurwiel kan op en af kantel, asook in en uit, so jy kan regtig jou bestuursposisie perfek kry.

Die nuwe BMW 540i (Foto: BMW)

Die Bowers & Wilkins-klankstelsel is asemrowend. Daar is ʼn kop-op-vertoon (HUD) wat in kleur vir jou allerhande inligting kan bied, tot navigasie-instruksies. Jou slimfoon koppel moeiteloos met BMW se stelsel en as jy eers iDrive baasgeraak het, kan jy dit hanteer sonder om die heeltyd na die skerms te kyk. Daar is ʼn draadlose slimfoonlaaier, so ’n mens sit net jou foon daar neer en hy laai vanself.

Die ritgehalte in die 5-reeks is ʼn aangename verrassing. Die 5-reeks is nie klein nie, maar hy raak sy gewig mooi baas. Hy voel nie te groot nie, en indien jy sport-modus kies, kan dié 540i sy sokkies nogal hoog optrek! Indien mens rustig ry is die sessilinder nie eens swaar op brandstof nie. Indien jy groot afstande aflê tussen afsprake en baie tyd in jou voertuig deurbring kan ek nie aan veel opsies dink waarin ek eerder sou wil ry nie. Ons rekenmeester het ook ʼn beurt gekry met die 540i. Sy sê sy’t altyd gekyk en gedink – hoekom sou ’n mens so ’n duur kar wil hê? Sy weet nou, en het haarself kort-kort gevang dat sy die verkeersligte mooi uitwerk dat sy heel voor is as hy groen slaan, sodat sy net nog ’n bietjie kon voel hoe hy jaag.

Die reeks lyk só:

Die reeks word gedek deur ʼn 2 jaar/onbeperkte km-waarborg en 5 jaar/100 000 km- omvattende instandhoudingsplan. Slegs die intree-spesifikasievlak is gelys. Daar is ook Sport Line, Luxury Line en M Sport beskikbaar in elke enjin.

Die kompetisie lyk só:

In dié klas voertuig is die prysgaping wyd. Dit gaan hier afhang van smaak. Die Volvo is ʼn ware winskoop teen die prys, en tóg die enigste viersilinder. Die Audi is die enigste V8 tussen die mededingers. Een van dié gaan jou hartsnare roer, maar sjoe – die 5-reeks is lieflik.