Padtoets: Dié Fiesta is eenvoud op sy beste

Die nuwe Ford Fiesta ST (Foto: Ford)

Die vinnige luikrug het in 1976 roem bereik met die bekendstelling van Volkswagen se eerste GTi. Effe anders van hoe hy in Suid-Afrika gelyk het, was die egte GTi ʼn voorwielaangedrewe 1.6-viersilinderenjin met Bosch-brandstofinspuiting en 80 kW. Vandag klink 80 kW soos kinderspeletjies, maar in 1976 toe die Golfie slegs 810 kg geweeg het, was die krag oorgenoeg … en dit sou die formule vorm wat gebruik is om vele suksesvolle warm luikrugmotors in die toekoms te maak.

In die negentigerjare het veiligheid en besoedeling oorgeneem as die grootste prioriteite. Ons warm luikrûe het maar louwarm geword, en al groter sodat hulle veilig kon wees. Om besoedeling te bekamp het slim tegnologieë ʼn groot filter op lekker enjins se karakter en sjarme geplaas. Nietemin, laat in die twintigerjare het een vervaardiger die lig gesien. Ja, daar is ʼn mark vir tegnologiese wonderwerke soos dubbelkoppelaar-ratkaste en stop-start-tegnologie, maar hier is ʼn goeie onderstel met ʼn bomklapper van ʼn enjin en ʼn gewone 6-spoed-handrat asemrowend.

Die nuwe Ford Fiesta ST (Foto: Ford)

In ʼn tyd van sedanmotors met oor die 400 kW het ons vergeet hoe lekker dit kan wees om vir die verrigting te werk. Om te leer hoe om ʼn kar se “knoppies” net reg te druk sodat hy sing. Dié Fiesta ST200, ʼn beperkte weergawe, is ʼn juweel.

Die ST keer terug na ʼn meer eenvoudige benadering. Twee deure, voorwielaandrywing, goeie ratkas en net genoeg krag. Die onderstel en vering is briljant gekalibreer sodat mens mettertyd leer hoe om al meer op die onderstel te leun en te vertrou dat die padhouvermoë daar is.

Ford se 1.6-viersilinderturbopetrolenjin word in die Fiesta gebruik. Direktebrandstofinspuiting maak dit moontlik dat die redelike klein enjin ʼn indrukwekkende 320 Nm kan bied. Dertig jaar terug sou mens aan ʼn V8 se deur moes klop om daai wringkragsyfers te kry. Die Fiestatjie snol van stilstand tot 100 km/h in 6.7 sekondes en hy sal aanhou tot 230 km/h.

Die binneruim voel nie so skoon soos van die nuwe voertuie wat beskikbaar is nie, maar die voertuig bly getrou aan Ford se ontwerpstyl. Die Recaro-sportsitplekke gryp mens lekker om die heupe en verseker dat jy nie rondval in die voertuig as jy die enjin se karakter probeer ontdek nie. Die vering is heel styf, so as ʼn Gauteng-pad ná die reënseisoen vol gate is, moet jy maar versigtig wees.

Die nuwe Ford Fiesta ST (Foto: Ford)

Die harde vering bied egter puik padhouvermoë, en die Fiesta het ʼn baie slim voorste ewenaar wat die wringkrag op so ʼn manier versprei dat die enjinkrag mens om draaie trek, in plaas van wyd stoot. Baie slim, en dit werk voorwaar goed. As mens dink die vashouvermoë is verby, dan kan die Fiesta nog lank aanhang.

Dié Fiesta het egter nog ʼn truuk in sy mou. Prysgewys kom nie een van sy mededingers naby nie, én dit is die enigste handrat, behalwe die baie duurder MINI Cooper S. Die Fiesta was ʼn fees, en dit is baie maklik om hom op te som. As jy daarvan hou om redelik veilig te ry asof jou broek aan die brand is, sonder ʼn skrikwekkende brandstofrekening, met plek vir vier en boonop ʼn kattebak, is daar min rygoed wat jou só sal vermaak nie.

Die reeks lyk só:

ModelKrag0– 00 km/hTopspoedBrandstofverbruikWaarborg
Fiesta ST134 kW/290 Nm6.9 sek220 km/h5.9 ℓ/100 kmR325 900
Fiesta ST200147 kW/320 Nm6.7 sek230 km/h5.9 ℓ/100 kmR339 900

Die reeks word gedek deur ʼn 4 jaar/120 000 km-waarborg en 4 jaar/60 000 km-diensplan.

Die kompetisie lyk só:

ModelKrag0– 00 km/hTopspoedBrandstofverbruikWaarborgPrys
Renault Clio RS200 Lux142 kW/ 260 Nm6.7 sek230 km/h5.9 ℓ/100 km5 jaar/150 000 km-waarborg

3 jaar/30 000 km-diensplan

R389 900
MINI Cooper S 3-deur141 kW/ 280 Nm6.8 sek235 km/h5.9 ℓ/100 km2 jaar/onbeperkte km-waarborg

5 jaar/100 000 km- omvattende instandhoudingsplan

R411 052

Tussen die mededingers is net die MINI ʼn handrat. Die Renault het ʼn dubbelkoppelaar-ratkas. Tussen dié mededingers is die Ford se krag en karakter ongeëwenaar, en sy prys onweerlegbaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

4 Kommentare

Joe_v_Niekerk ·

Die ST200 het die beste enjin, onderstel en ratkas kombinasie (gemeet teen die prys) van al die motors wat ek nog kon evalueer. As Ford nou net nog kan leer (verkieslik by die leier in die veld, nl. VW) om die binneruim ‘n minder sombere plek te maak (minder goedkoop swart en grys plastiekafwerking), sal hulle produkte nog beter verkoop.

Vraagteken ·

Joe, die persoon wat so ‘n voertuig koop stel nét belang aan spoed en versnelling. Die Ford sal sirkels om die Polo ry. As hulle die binneruim verbeter dan sal die prys opgaan – dan is dit nie meer so ‘n goeie koop nie. Dis nie asof sy binneruim sleg is nie; die ST het ‘n uitstekende klanksisteem en hy is baie still teen 120 km/h. Die polo, aan die ander kant, hou daarvan om klein bietjie te raas by sy B-pillar as jy 120 km/h ry.

Joe_v_Niekerk ·

Die nuwe Polo GTI met sy goeie afwerking en bougehalte sal ‘n ‘veilige’ keuse wees, jou ouma sal veral in die skik wees met jou keuse wanneer sy Sondae jou motor leen om kerk toe te ry.

Die bergpasse is blykbaar meer genotvol met ‘n dinamiese onderstel…

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.