Padtoets: Dinamiet kom in klein pakkies …

Die Picanto 1.2 Smart. Foto: Verskaf

Die kompakteluikrugsegment is verreweg die grootste motorsegment in Suid-Afrika. Die twee markleiers saam, die Polo en Vivo, verkoop gereeld oor die 5 000 eenhede. Dus is ʼn sterk mededinger in dié segment van sleutelbelang.

As ons na die Maart 2018-verkoopsyfers kyk, wys dit dat daar 789 Kia Picanto’s gedurende die maand verkoop is. Sjoe! Dit is verskriklik indrukwekkende syfers. Onthou, Honda as handelsmerk het altesaam 942 voertuie verkoop. Voorwaar ʼn prestasie.

Die Picanto 1.2 Smart. Foto: Verskaf

Dit is vir my wel geen verrassing nie. Die Kia Picanto is ʼn 2018-finalis vir Wesbank se motor van die jaar-kompetisie. Dit is ʼn uiters modieuse buksie met ʼn aantreklik pakkie aan, skoene en al. Die binneruim stel geensins teleur nie, met funksionaliteit wat gewoonlik eers by groter, duurder voertuie te vinde is soos Apple CarPlay, truratkamera en aanboordrekenaar.

Die paneelbord en instrumentasie bly getrou aan Kia se huidige ontwerptaal wat geensins ʼn slegte ding is nie. Die materiale is duursaam maar netjies en nie so hard soos mens in kleiner karre verwag nie. In ons toetsmodel was daar leerbekleedsel wat lekker duursaam sou wees, maar lap sit vir my lekkerder.

Die Picanto 1.2 Smart. Foto: Verskaf

Die binneruim is kompak, maar ruim genoeg vir vier volwassenes, óf twee volwassenes en drie kleintjies. Isofix is standaard in alle modelle, so die kleintjies bly veilig vasgegespe. Net die intreemodel het nie ABS nie om die Picanto teen ʼn spesifieke prys beskikbaar te stel, maar die res van die reeks het ABS, plus ʼn bestuurder- en passasierlugsak.

Die ritgehalte in die Picanto beïndruk vir so ʼn klein buksie. Vantevore kon klein karretjies nie só volwasse en luuks voel nie – iets wat die Picanto baie goed regkry.

Die Picanto 1.2 Smart. Foto: Verskaf

Die enjin is heel gretig vir die grootte voertuig: ʼn 1.25-viersilinderpetrolenjin gepaard met ʼn vyfspoedratkas hou dinge eenvoudig. Die enjin is lekker gekalibreer, so hy trek sterk deur die toere en as mens rustig ry, is hy verskriklik lig op brandstof.

As algehele pakket het die Picanto vir my geen foute nie. Dit is ʼn uiters modieuse, kompakte ryding wat baie groter skoene vul as wat sy dimensies en prys vra. Die spesifikasievlak is vir my puik en Kia se markleidende waarborg gaan verseker dat jy vir jare jou Picanto kan geniet. Gaan kyk self, jy sal verras wees.

Die reeks lyk só:

Picanto 1.0 Start49 kW/95 NmR139 495
Picanto 1.0 Street49 kW/95 NmR154 495
Picanto 1.2 Start61 kW/122 NmR155 495
Picanto 1.0 Style49 kW/95 NmR164 495
Picanto 1.2 Start outo61 kW/122 NmR168 495
Picanto 1.2 Street61 kW/122 NmR170 495
Picanto 1.0 Style outo49 kW/95 NmR177 495
Picanto 1.2 Style61 kW/122 NmR181 495
Picanto 1.0 Smart49 kW/95 NmR185 495
Picanto 1.2 Style outo61 kW/122 NmR194 495
Picanto 1.2 Smart61 kW/122 NmR201 495
Picanto 1.2 Smart outo61 kW/122 NmR214 495

Die reeks word gedek deur ʼn 5 jaar/onbeperkte km-waarborg; ʼn 2 jaar/45 000 km-diensplan is opsioneel.

Die kompetisie lyk só:

Suzuki Ignis 1.2 GLX61 kW/113 Nm5.1 ℓ/100 km3 jaar/100 000 km-waarborg

2 jaar/30 000 km-diensplan

R191 900
Toyota Aygo 1.0 X-Cite51 kW/95 Nm4.4 ℓ/100 km3 jaar/100 000 km-waarborg

Diensplan opsioneel

R193 100
Volkswagen cross up!55 kW/95 Nm4.7 ℓ/100 km3 jaar/120 000 km-waarborg

Diensplan opsioneel

R201 500
Hyundai Grand i10 1.2 Glide64 kW/120 Nm5.9 ℓ/100 km5 jaar/150 000 km-voertuigwaarborg

7 jaar/200 000 km-dryfstelselwaarborg

2 jaar/30 000 km-diensplan

R204 900
Fiat Panda 0.9 TwinAir Lounge63 kW/ 145 Nm4.2 ℓ/100 km3 jaar/100 000 km-waarborg

3 jaar/100 000 km-diensplan

R214 900

Tussen dié mededingers is almal regtig sterk en persoonlike smaak sal ʼn groot rol speel. Gaan toets almal, maar moet beslis nie die Kia miskyk nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Christa ·

Het Aug 2017 my Picanto 1.2 smart gekoop. Net jammer op 6600 km moes hulle my hele clutch ens vervang en nou weer op 10000km doen hy presies dieselfde. Jammer dat ek al weke sukkel met Kia om dit uit te sorteer. Ek is mal oor my kar maar agv die probleme verloor el vertroue

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.