Ek glo motorjoernaliste het die lekkerste werk op aarde, maar omdat ons gereeld verskillende voertuie toetsbestuur en motorbekendstellings bywoon, moet ʼn motor gewoonlik baie goed wees om te beïndruk.
Terselfdertyd is dit ook moeilik om ʼn voertuig in ʼn paar minute of kilometer te leer ken.
Een só ʼn motor was die Kia Rio. Met die bekendstelling was die roete nie baie lank nie en het die motors baie min kilo’s gehad. Toe die Rio by die kantoor opdaag vir sy deeglike toets, was dit heeltemal ʼn ander voertuig.
Die Rio se ontwerp is steeds mooi, stiller eerder as “wintie” – maar ek hou daarvan. Die binneruim is eintlik luuks vir dié klas, en uiters gemaklik. Dan kom ons by die verbasende deel. Die Rio het twee verskillende uitrustings in sy kas. Mens kan dit regtig net rustig vat en uiters goeie brandstofverbruik kry terwyl jy dit doen – 6.1 ℓ/100 km, so duidelik is ʼn turbopetrolenjin met klein kapasiteit nie nodig nie.
Maar indien jy bietjie haastig wil wees, skop ʼn paar ratte terug en laat die toere bou, by 5 000 r/min trek die Rio vinnig sy ander pakkie aan en dan snol hy tot by 6 300 r/min met nuutgevonde dringendheid.
Nee, dit is geen witwarm luikrug nie, maar enige persoon wat sê dat die atmosferiese 1.4-viersilinderpetrolenjin pap is, weet nie hoe om die beste uit hom uit te kry nie. Dié enjin bied 74 kW en 135 Nm. Om te dink, die uiters gewilde Ford Escort 1600 Sport uit die 70’s het maar 62 kW en 125 Nm gebied – en die Escort wás wintie. Die Rio sal 0-100 km/h in 11.5 sekondes aflê en 176 km/h behaal. Oorgenoeg, dink ek.
Op die pad is die kajuit goed geïsoleer – amper te goed! As jy nie die spoedmeter dophou nie, hol jy sommer vinnig 160 km/h op die snelweg. Die ritgehalte is lekker sag en die padhouvermoë heeltemal voldoende. Die wisselaksie van die handrat is seepglad en die meganisme voel asof die ingenieurs hom gemaak het om duisend jaar te hou.
Eenstryk deur ʼn puik kar. As jy een koop, gaan jy ook sy verskeie karakters leer ken en maats raak met hulle almal. ʼn Eienskap waarna elke motorvervaardiger streef, is dat jy jou kar sal liefhê, en ek dink nie dit sal moeilik wees om jou hart op ʼn Rio te verloor nie.
Die reeks lyk só:
Rio 1.2 LS | 62 kW/120 Nm | 5.4 ℓ/100 km | R219 995 |
Rio 1.4 LX | 74 kW/135 Nm | 5.7 ℓ/100 km | R234 995 |
Rio 1.4 LX outo | 74 kW/135 Nm | 6.0 ℓ/100 km | R247 995 |
Rio 1.4 EX | 74 kW/135 Nm | 5.8 ℓ/100 km | R249 995 |
Rio 1.4 EX outo | 74 kW/135 Nm | 6.0 ℓ/100k m | R262 995 |
Rio 1.4 TEC | 74 kW/135 Nm | 5.8 ℓ/100 km | R274 995 |
Rio 1.4 TEC outo | 74 kW/135 Nm | 6.0 ℓ/100 km | R287 995 |
Slegs die luikrugmodelle is gelys. Die reeks word gedek deur ʼn 5 jaar/onbeperkte km-waarborg en 4 jaar/60 000 km-diensplan.
Die kompetisie lyk só:
Suzuki Swift 1.4 GLS | 70 kW/130 Nm | 5.5 ℓ/100 km | 5 jaar/200 000 km- waarborg 3 jaar/60 000 km- diensplan | R225 900 |
Ford Fiesta 1.0T Ambiente | 74 kW/170 Nm | 4.3 ℓ/100 km | 4 jaar/120 000 km-waarborg 4 jaar/60 000 km- diensplan | R226 900 |
Toyota Yaris 1.5 Pulse | 82 kW/136 Nm | 5 ℓ/100 km | 3 jaar/100 000 km- waarborg 3 jaar/45 000 km- diensplan | R228 700 |
Opel Corsa 1.0T Enjoy | 85 kW/170 Nm | 5 ℓ/100 km | 5 jaar/120 000 km-waarborg 3 jaar/60 000 km- diensplan | R234 300 |
Mazda 2 1.5 Individual | 82 kW/145 Nm | 5.5 ℓ/100 km | 3 jaar/onbeperkte km-waarborg 3 jaar/onbeperkte km-diensplan | R243 300 |
Peugeot 208 1.2T GT Line | 81 kW/205 Nm | 4.5 ℓ/100 km | 3 jaar/100 000 km- waarborg 3 jaar/45 000 km- diensplan | R259 900 |
Renault Clio 88kW turbo GT-Line | 88 kW/205 Nm | 5.3 ℓ/100 km | 5 jaar/150 000 km- waarborg 3 jaar/45 000 km- diensplan | R264 900 |
Volkswagen Polo 1.2TSI Highline | 81 kW/175 Nm | 5.1 ℓ/100 km | 3 jaar/120 000 km- waarborg 3 jaar/45 000 km- diensplan | R278 600 |
Hyundai i20 1.4 Sport | 85 kW/160 Nm | 6.5 ℓ/100 km | 5 jaar/150 000 km- voertuigwaarborg 7 jaar/200 000 km- dryfstelselwaarborg 3 jaar/60 000 km- diensplan | R292 900 |
Die kompetisie is wild in dié segment. Die Suzuki, Ford en Toyota is ware winskope. Die Hyundai se prys is heeltemal te kwaai. Hoewel die Rio hoog prys tussen die mededingers, is sy gehalte onmiskenbaar. Hy het die sterkste spesifikasievlak en beste waarborg tussen die mededingers. Hy is ook van die ruimste in dié klas en dus beslis ʼn opsie.
Ek ry die Kia Sportage. Was skrikkerig om weg te beweeg van die ou name soos Volkswagen en Toyota. Maar ek was nog nie een dag spyt nie. Hierdie voertuig se werkverrigting is puik. Hanteer soos n droom en vertoon ook pragtig.
Hmmm… 11.5 sekondes van 0 tot 100 is “oorgenoeg”? Dalk in die 1990s…
Selfs ‘n Toyota Etios kan dit in 10.6 sekondes doen…
Kia se tv advertensie maak dat ek inderdaad NOOIT ñ Kia sal koop nie!