Renault, Nissan en Mitsubishi is nou deel van een wêreldgenootskap. Renault se Koleos deel enjins, ratkaste en dryfstelsels met Nissan se Xtrail. Die huidige Koleos is ʼn aantreklike middelgrootte sportnuts met ʼn indrukwekkende spesifikasievlak … maar hoekom verkoop daar nie meer van hom nie?
Die buiteontwerp is beslis uniek en een van die mooier sportnutse wat tans rondrits. Die binneruim beïndruk nóg meer. Daar is elektries verstelbare sitplekke, leer, klimaat- en spoedbeheer, truratkamera, elektroniese handrem, digitale instrumente, outomatiese ligte en ruitveërs – de lot. Aan die veiligheidskant van sake is daar lugsakke, ABS, EBD, vastrap en stabiliteitsbeheer.
Die alles fyn – maar dit bring my by die Koleos se teleurstelling. Die Koleos word aangedryf deur Nissan se atmosferiese 2.5-viersilinderpetrolenjin. Goed. Die enjin bied selfs ʼn indrukwekkende 126 kW en ʼn minder indrukwekkende 233 Nm. Die enjin in die eerste Xtrails het ʼn 4-spoed- outomatiese ratkas gehad en was afgryslik swaar op petrol. Hy het nou ʼn 8-spoed-palwisseltransmissie. Dit maak hom baie lig op brandstof, maar klink aardig – en as mense enigsins meer as rustig wil versnel, raas dit verskriklik.
Die CVT hou omwentelinge lekker laag as ʼn mens rustig op die snelweg toer of stadig in die dorp rondploeter, maar sodra jy voet in die hoek sit, begin die ratkas rondspring om krag te bied. Dis onaangenaam. Ander produkte in die mark waar palwisseltransmissies met turbo-enjins gepaardgaan, vaar baie beter. Op die oop pad toer die Koleos lekker, en die ritgehalte is heel goed. Padhouvermoë is in die kol vir dié soort voertuig.
Die Koleos is maklik om op te som. Dit is ʼn lieflike produk wat deur sy enjin/ratkas-paring teleurgestel word. Wat in sy guns tel, is sy vierwielaandrywing en billike prys – so as ʼn mens altyd werklik rustig ry, is dit ʼn puik produk.
Die reeks lyk só:
Renault Koleos 2.5 Expression | R439 900 |
Renault Koleos 2.5 Dynamique | R489 900 |
Renault Koleos 2.5 Dynamique 4WD | R529 900 |
Die reeks word deur ʼn 5 jaar/150 000 km-waarborg en 5 jaar/90 000 km-diensplan gedek.
Die kompetisie lyk só:
Kia Sportage 2.0 Ignite Plus outo | 115 kW/196 Nm | 8.1 ℓ/100 km | 5 jaar/onbeperkte km-waarborg en 90 000 km-diensplan | R454 995 |
Jeep Compass 1.4T Limited | 125 kW/250 Nm | 7.4 ℓ/100 km | 3 jaar/100 000 km- waarborg en -diensplan | R468 729 |
Hyundai Tucson 2.0 Premium outo | 115 kW/196 Nm | 9 ℓ/100 km | 5 jaar/150 000 km- voertuigwaarborg 7 jaar/200 000 km- dryfstelselwaarborg 5 jaar/90 000 km- diensplan | R474 900 |
Mazda CX-5 2.0 Dynamic outo | 121 kW/213 Nm | 6.9 ℓ/100 km | 3 jaar/onbeperkte km-waarborg en -diensplan | R479 700 |
Ford Kuga 1.5T Trend outo | 132 kW/240 Nm | 6.9 ℓ/100 km | 4 jaar/120 000 km- waarborg 6 jaar/90 000 km- diensplan | R494 900 |
Nissan X-Trail 2.5 4×4 Acenta Tech | 126 kW/233 Nm | 8.3 ℓ/100 km | 6 jaar/150 000 km- waarborg 3 jaar/90 000 km- diensplan | R505 900 |
Opel Grandland X 1.6 Turbo Enjoy | 121 kW/240 Nm | 7.0 ℓ/100 km | 5 jaar/150 000 km- waarborg 5 jaar/100 000 km- diensplan | R514 000 |
Subaru Forester 2.0i-L ES | 115 kW/196 Nm | 7.6 ℓ/100 km | 5 jaar/150 000 km- waarborg 3 jaar/75 000 km- omvattende instandhoudingsplan | R517 000 |
Citroen C5 Aircross 1.6T Shine | 121 kW/240 Nm | 7.9 ℓ/100 km | 5 jaar/100 000 km- waarborg en -diensplan | R539 900 |
Toyota Rav4 2.0 AWD GX-R | 127 kW/203 Nm | 6.7 ℓ/100 km | 3 jaar/100 000 km- waarborg 6-dienste-diensplan | R552 600 |
Honda CR-V 2.0 Elegance | 113 kW/189 Nm | 7.3 ℓ/100 km | 5 jaar/200 000 km- waarborg 5 jaar/90 000 km- diensplan | R554 200 |
Volkswagen Tiguan 1.4 TSI Comfortline | 110 kW/250 Nm | 6.8 ℓ/100 km | 3 jaar/120 000 km- waarborg 5 jaar/90 000 km- diensplan | R568 400 |
Tussen dié mededingers is slegs die Koleos, X-Trail, Forester en Rav4 vierwielaangedrewe voertuie. Die klas is wyd met baie opsies. Kyk gerus na almal.
Want dis ‘n Renault