Ses sitplekke die oplossing

Foto: Verskaf

Ek het ʼn ruk gelede ʼn week met ʼn fantastiese voertuig deurgebring. Ek dink ek is verlief op die enjin meer as enigiets anders. Maar eers – ek dink BMW het die perfekte oplossing vir dié korona-storie. ʼn Groot sportnutsvoertuig met ses sitplekke. Twee voor, twee in die middel en twee heel agter. Almal ʼn entjie uit mekaar gespasieer. Lekker.

Ek praat hier van BMW se X7. Die ontwerp ontlok uiteenlopende menings. Ek persoonlik dink dis fantasties. Ja, die nier-sierrooster is te groot – maar dit pas by die imposante ontwerp. Dis nie veronderstel om teruggetrokke te wees nie; dít is BMW se vlagskip-sportnuts – en dit moet só lyk. Al lyk die X7 reusagtig, voel hy wel geensins groter as ʼn X5 op die pad nie.

Die binneruim is waar dinge ultraluuks raak. Die X7 op toets is die M50d met die opsionele ses sitplekke. Die gewone model kom met sewe sitplekke in ʼn konfigurasie van twee, drie, twee – maar in die sessitplekmodel is dit twee, twee, twee. Die tweede ry kry dan elektries verstelbare luukse rusbanke in plaas van gewone sitplekke – skerms, oorfone en al. Dié opsie is beslis meer vir die kliënt wat gechauffeur word as een wat self ry.

Die binneruim is gepeper met elke denkbare luuksheid, verhitte en verkoelde sitplekke, klimaatbeheer, aanpasbare spoedkontrole met botsingwaarskuwing en baanbeheer, kop op vertoon (HUD) … de lot. Die Bowers & Wilkins-klankstelsel gepaard met Apple CarPlay maak die X7 ʼn fantastiese plek om te ontspan, die rit te geniet en na jou gunstelingmusiek kliphard te luister.

Foto: Verskaf

Dit bring my by een van BMW se huidige juwele. Die enjin. Dit is BMW se 3.0-inlynsessilinderturbodiesel. Maar met vier turbo’s. VIER! Dit is eerder ʼn kragstasie as ʼn kragbron. Die enjin bied 294 kW en 760 Nm. O ja, 0-100 km/h duur ʼn skamele 5,4 sekondes en die X7 is beperk tot ʼn fantastiese 250 km/h. Nou kyk, die X7 weeg 2 535 kg sonder brandstof óf passasiers. Kom ons noem dit ʼn ronde 2 750 kg. ʼn Sportnuts van twee en ʼn driekwart ton wat vinniger 100 km/h haal as Magnum se Ferrari.

Die krag en spoed is wel nie die M50d se enigste troefkaart nie. Daarvan kan ek getuig in my week wat ek met die X7 deurgebring het. As ʼn mens rustig ry op die snelweg, 120 km/h op die spoedkontrole, gee hy 6.3 ℓ/100 km. Dis puik. Dan, as ʼn mens soos ʼn barbaar ry en die X7 misbruik as sportmotor, styg die brandstofverbruik na 11.7 ℓ/100 km. Daar is bitter min voertuie wat daai veelsydigheid kan bied.

Op die pad verbaas die X7 verder. Daar is so te sê geen geraas, vibrasie en hardheid (NVH: noise, vibration and harshness) nie. Die kajuit is puik geïsoleer. Die X7 maak gebruik van lugvering en loop op fantastiese 22”-wiele. Dit sou gewoonlik ʼn resep vir ʼn ramp wees. Lugvering en groot wiele kan gereeld baie lomp voel – nie op die X7 nie. Bitter min van die stamp weens die laeprofielbande dring deur tot in die kajuit. Nog ʼn aspek waar BMW die haas uit die hoed getrek het, is in die padhouvermoë-afdeling. ʼn Sportnuts van amper drie ton het geen rede om só goed te hanteer nie.

Foto: Verskaf

Ek het nou al twee keer tyd met ʼn M50d deurgebring. Verlede jaar het ek Paasnaweek my woonwa met ʼn X5 M50d gesleep en my vrou is nou nog verlief. Die M50d-enjin vat ʼn puik produk, en maak dit asemrowend. ʼn Mens hoef nie die krag te gebruik nie – maar dis daar. Dit is ook een van die enigste dieselenjins wat ʼn puik klankbaan kan bied. Kyk, die X7 is oortolligheid op sy beste, maar as ek in dié prysklas gespeel het, sou hy beslis op my kortlys gewees het … spesifiek ʼn wit X7 M50d, met 22”-wiele, dankie.

Die reeks lyk só:

Die reeks word gedek deur ʼn 2 jaar/onbeperkte km-waarborg en 5 jaar/100 000 km- omvattende instandhoudingsplan.

Die kompetisie lyk só:

Tussen dié mededingers is dit slegs die Volvo XC60 wat ʼn sessitplekopsie bied. Dit is ook die Volvo wat geensins naby sy beweerde brandstofverbruiksyfer kan kom wat in ʼn laboratorium bereik is met sy hibridiese dryfstelsel nie. Die Range Rover bied slegs vyf sitplekke, en vier in hul luuksste modelle. In dié prysklas is die meeste motors fantasties – maar as dit my geld was, sou ek nie sonder daai M50d kon leef nie.