Die mediumgrootte gesinsmotor was altyd ʼn sedan gewees. Sitplek vir vyf met ʼn lekker groot kattebak. Dink aan motors soos die Corolla en Jetta. Dit was in talle Suid-Afrikaanse huishoudings stapelvervoer.
Met die geleidelike afsterwe van die sedanmotor is daar twee buksies wat wil kom stoei vir sy markaandeel, die klein tot mediumgrootte sportnutsvoertuig en die kruismodel. Ek persoonlik hou niks van ʼn kruismodel nie – dit is eintlik net ʼn opgepompte mediumgrootte luikrug en bied niks unieks teenoor die gewoonlik goedkoper luikrug nie. Waar dinge wel aanloklik raak, is met klein of mediumgrootte sportnutsvoertuie wat behoorlike grondvryhoogte en vierwielaandrywing bied.
Hier gaan ek een van elk met mekaar vergelyk en sien wat gaan vir wat. Mahindra se nuwe XUV 300 is ʼn reusetree in die regte rigting vir die handelsmerk, en Renault se Duster is uiters gewild in Suid-Afrika. Die Mahindra is ʼn kruismodel, en die Duster ʼn sportnuts. Kom ons kyk:
Ontwerp:
Mahindra XUV 300 1.5TD W8 Punt: 4/5 | Renault Duster 1.5dCi Techroad EDC Punt: 4/5 |
Albei tjorre is netjies en nie een is lelik nie. Die XUV 300 het netjiese hoekige lyne en sy ontwerp is goed afgerond. Persoonlik hou ek baie van die nuwe Duster se meer afgeronde ontwerp. Die Duster lyk taai dog netjies.
Binneruim:
Mahindra XUV 300 1.5TD W8 Punt: 3/5 | Renault Duster 1.5dCi Techroad EDC Punt: 5/5 |
Soos ek in die inleiding gesê het, gee die nuwe XUV 300 vir Mahindra ʼn reusetree in die regte rigting. Die Mahindra kan nou as luuks beskou word, met elke funksie wat mens sou wou hê. Hy verloor wel ʼn punt in die afwerking van die nuwe truuks. Die knoppies kan effe goedkoop voel hier en daar … en dis waar die Duster hom klop. Die Duster se nuwe binneruim is baie netjies uitgelê, en die verbetering in gehalte van die knoppies en skakelaars is indrukwekkend. Tot hul sitplekke het nou die behoorlike steun waarvoor ek al ʼn ruk lank vra. Die Duster voel ruimer as die XUV 300 ook, en daar kry hy nog ʼn punt.
Enjin, ratkas en dryfstelsel:
Mahindra XUV 300 1.5TD W8 Punt: 4/5 | Renault Duster 1.5dCi Techroad EDC Punt: 5/5 |
Mahindra se nuwe 1.5-diesel is ʼn ware juweel. Lekker sterk én lig op brandstof. Die 6-spoedhandrat is waar die XUV sy punt verloor. Die koppelaar se kalibrasie moet nagegaan word. Dit raak effe moeilik om perfek weg te trek sonder ʼn geruk en pluk. Renault se 1.5-viersilinderturbodieselenjin is fantasties. Dit is die Renault/Nissan/Mitsubishi-alliansie se mees gebruikte enjin ter wêreld. Hy bied billike krag en asemrowende brandstofverbruik. Waar die Duster nóg ʼn punt verdien: Hy is in handrat en outo beskikbaar, óf as ʼn vierwielaangedrewe handrat. Indien jy nie die 4WD nodig het nie, is die outo beslis die beste keuse.
Ritgehalte, padhouvermoë en veiligheid:
Mahindra XUV 300 1.5TD W8 Punt: 4/5 | Renault Duster 1.5dCi Techroad EDC Punt: 4/5 |
Die Renault het fantastiese ritgehalte. Lekker soepel vering en behoorlike bande met ʼn groot profiel laat die Duster soos ʼn droom toer. Padhouvermoë is in die kol vir só ʼn tipe voertuig. Die 4WD-model bied heeltemal ʼn ander dimensie aan die motor teen dié prys. Die Mahindra is effe harder geveer as die Duster, maar verder toer hy lekker. Waar hy wel groot punte opmaak, is die feit dat hy sewe lugsakke het teenoor die Duster se vier – ʼn groot veer in sy hoed.
Opsomming:
Mahindra XUV 300 1.5TD W8 Puntetotaal: 15/20 | Renault Duster 1.5dCi Techroad EDC Puntetotaal: 18/20 |
Dit is maklik om dié twee buksies op te som. Albei is lekker rygoed en sterk mededingers vir hul handelsmerke. Die Mahindra wys waarheen die handelsmerk op pad is, en dis indrukwekkend. Waar die Duster uitblink, is dat dit uiters gewild is in Suid-Afrika, en ʼn bekwame gesinsbuks. Ek’t my woonwa al ʼn kort afstand met een gesleep, en ʼn bietjie ligte veldry en 4×4-hindernisse gaan aandurf met een. Dis ʼn puik motor, en bly my keuse.
Die twee vergelyk só:
Mahindra XUV 300 1.5TD W8 | Renault Duster 1.5dCi Techroad EDC | |
Enjin | 1.5-viersilinderturbodiesel | 1.5-viersilinderturbodiesel |
Krag | 86 kW/300 Nm | 80 kW/250 Nm |
Ratkas | 6-spoedhandrat | 6-spoeddubbelkoppelaar outo |
Topspoed | 175 km/h | 169 km/h |
Brandstofverbruik | 4.8 ℓ/100 km | 4.8 ℓ/100 km |
Diensplan & waarborg | 5 jaar/150 000 km-waarborg 5 jaar/90 000 km-diensplan | 5 jaar/150 000 km-waarborg 3 jaar/45 000 km-diensplan |
Prys | R324 999 | R340 900 |
Die kompetisie lyk só:
Ford EcoSport 1.0T Titanium outo | Kia Seltos 1.4T-GDi GT-Line | Suzuki Vitara 1.4T GLX outo | |
Enjin | 1.0-driesilinderturbo-petrol | 1.4-viersilinderturbo-petrol | 1.4-viersilinderturbo-petrol |
Krag | 92 kW/170 Nm | 103 kW/240 Nm | 103 kW/220 Nm |
Ratkas | 6-spoed- wringkragomsitter outo | 7-spoed- dubbelkoppelaar outo | 6-spoed- wringkragomsitter outo |
Topspoed | 181 km/h | 189 km/h | 200 km/h |
Brandstofverbruik | 6.3 ℓ/100 km | 6.3 ℓ/100 km | 5.9 ℓ/100 km |
Diensplan & waarborg | 4 jaar/120 000 km- waarborg 4 jaar/60 000 km- diensplan | 5 jaar/onbeperkte km-waarborg 5 jaar/90 000 km- diensplan | 5 jaar/200 000 km- waarborg 4 jaar/60 000 km- diensplan |
Prys | R370 400 | R460 995 | R405 900 |
Die mededingers is wel die reeksleiers vir hul onderskeie handelsmerke, dus is die pryse kwaai. Ek staan by die Duster as my keuse, sou dit my geld wees. Ek moet egter nog die Kia Seltos onder hande kry.
Ons het so ‘n tyd gelede ‘n VW TCross gekoop teen R333K en as ek hom in dieselde bondel voertuie soos hier bo sou sit, sou ek nog steeds die TCross gekoop het.
Lekker ry!
Ek het selwers vir 4 jaar n 4×4 Duster besit.
Kalahari sand. Vrystaatse potholes. Nasionale snelweë. Lesotho se bergpasse en ook van die redelike grond paaie in Lesotho en sneeu.
Geen probleem nie.
Het n 105.000km diensplan uitgeneem en die persoon wat die voertuig op 108.000km gekoop het kani uitgepraat raak oor ekonomie en ritgehalte nie.
Dit is nie n LandCruiser of Pajero nie.
Maar in sy klas het hy nie sy gelyke nie.
Dagsê Karlahari
Baie dankie vir jou kommentaar. Die nuwe 4WD duster se ratkas is effe aangepas oor die vorige model. Sy 6de rat is baie langer en dit maak ‘n reuse verbetering op brandstofverbruik. Waar die vorige model naby 3 500 r/min geluier het op 120 km/h, toer die nuwe een nader aan 2 600 r/min teen 120 km/h.
Groetnis
Brendon
nms Maroela Media
Ek ry maar steeds my VW Jetta 1800 ’89. Brandstofverbruik is steeds dieselfde sedert ons die moter aangekoop het en het tans 358952 kilos op die klok………my tjorrie van 23 jaar sal ek baie moeilik laat gaan………..tereg gesê – die kattebak se grootte is nog die beste………
Net jammer die een is ‘n Renault.