Ons kon onlangs twee Mercedes-Benz-voertuie direk ná mekaar op die proef stel.
Ek’t gewonder – hoekom sou Mercedes-Benz twee motors vervaardig wat amper identies is? Nadat ek met hulle albei gery het, verstaan ek egter hoekom.
Die twee motors ter sprake is die A200-sedan en die CLA 200.
Ontwerp:
Die A200-sedan is presies wat dit sê – ʼn doodgewone vierdeur-sedanmotor met sitplek vir vyf. Die CLA 200 is óók ʼn vierdeur-motor met sitplek vir vyf, maar hy’t die “koepee”-siekte wat alle vervaardigers op elke reeks toepas. Dink GLC coupé, of X4, X6, ens. Vat ʼn gewone motor, druk sy boude stomp sodat hy soos ʼn piesang lyk, en siedaar – ʼn koepee met vier deure. Ek moet byvoeg dat die woord koepee twee deure beteken. Ja, ek verstaan ook nie.
Binneruim:
Die twee voertuie is amper identies in die binneruim. Die enigste groot verskil is die laer daklyn vir agterste passasiers weens die bogenoemde koepee-siekte. Verder het die CLA ʼn mooier kleurskema gehad – maar dis alles opsies en jy kan jou A, óf CLA, verander nes jy dit wil hê. ʼn Opsie wat die A200 gehad het, wat maar standaardspesifikasie moet word deur die hele reeks, is die groter skerm. Die paneel waarin die skerms lê, is altyd dieselfde grootte, maar die kleiner skerm steek af teen die res van die kajuit.
Enjin en ratkas:
Albei voertuie word aangedryf deur Mercedes-Benz se nuwe 1.3-viersilinderturbopetrolenjin. Hy bied 120 kW en 250 Nm. En 0–100 km/h neem ʼn billike 8,1 sekondes – veral vir ʼn 1.3. Hier is dit waar dinge baie interessant raak. In die A200 voel die enjin baie grof en die ratkas traag. In die CLA is daar baie minder vibrasie en geraas van die enjin en die ratkas baie gladder. Daar is tegnies geen verskil tussen die twee nie. Al wat ek kan dink, is dat die CLA nuwer programmering bevat. Waar die 1.3 wel tot sy eie reg kom, is met brandstofverbruik. Op die oop pad is die A200 én CLA 200 voorwaar lig op petrol.
Ritgehalte en padhouvermoë:
Die ritgehalte op die twee, albei die intreemodelle in hul reeks, is puik. Dis te danke aan kleiner wiele. Sodra mens na AMG-produkte begin kyk, loop hulle almal op reusewiele met piepklein bandprofiele. Padhouvermoë is in die kol vir dié soort voertuig en mens kan alles geniet wat die 1.3 te bied het.
Veiligheidstelsels:
Mercedes-Benz bou nog altyd prima voertuie. Die A en CLA het elke denkbare veiligheidstelsel, aktief en passief. Die botsingwaarskuwingstelsels in nuwer voertuie werk puik in die verkeer om jou vroeg bewus te maak van die verkeer wat skielik stilhou. Een van Merc se stelsels wat beslis aandag kort, is die lane keep assist. Sodra die voertuig dink mens dwaal uit jou baan uit, pluk hy die motor terug met ʼn hengse gejuig terwyl hy redelik aggressief rem. Die eerste keer dat dit gebeur, het mens byna ʼn ambulans en defibrillator nodig om jou hart weer aan die gang te kry. Verder werk alles mooi in harmonie met die voertuig.
Om die twee op te som is maklik. Dis ʼn jammerte dat ons ʼn tendens het waar ons wegbeweeg van sedanmotors af. Dit ry lekker en is meer prakties as wat mense dink, veral met kattebakspasie. Om die een of ander onverklaarbare rede voel die CLA beter afgerond en ʼn luukser produk as die A200-sedan. Gelukkig is my kinders nog nie lank nie, so die simpel dak sal hulle nie pla nie.
Die reekse lyk só:
A-klas-sedan
Mercedes-Benz A200 sedan Progressive | 120 kW/250 Nm | 5.4 ℓ/100 km | R541 000 |
Mercedes-Benz A200d sedan Progressive | 110 kW/320 Nm | 4.5 ℓ/100 km | R579 000 |
Mercedes-Benz A250 sedan AMG Line | 165 kW/350 Nm | 5.4 ℓ/100 km | R615 771 |
Mercedes-Benz A200d sedan AMG Line | 110 kW/320 Nm | 4.5 ℓ/100 km | R629 175 |
CLA
Mercedes-Benz CLA200 | 120 kW/250 Nm | 5.5 ℓ/100 km | R579 380 |
Mercedes-Benz CLA220d | 110 kW/320 Nm | 4.4 ℓ/100 km | R622 000 |
Mercedes-Benz CLA200 AMG Line | 120 kW/250 Nm | 5.5 ℓ/100 km | R629 555 |
Mercedes-Benz CLA220d AMG Line | 110 kW/320 Nm | 4.4 ℓ/100 km | R672 175 |
Mercedes-Benz CLA200 Edition 1 | 120 kW/250 Nm | 5.5 ℓ/100 km | R677 980 |
Mercedes-Benz CLA220d Edition 1 | 110 kW/320 Nm | 4.4 ℓ/100 km | R720 600 |
Die kompetisie lyk só:
Audi A3 30TFSI sedan | 110 kW/250 Nm | 4.8 ℓ/100 km | 1 jaar/onbeperkte km-waarborg 5 jaar/100 000 km- omvattende instandhoudingsplan | R490 410 |
BMW 220i Coupé Sport Line | 135 kW/270 Nm | 5.5 ℓ/100 km | 2 jaar/onbeperkte km-waarborg 5 jaar/100 000 km- omvattende instandhoudingsplan | R580 159 |
Nie oortuig dat ‘n klein turbo enjin die antwoord is in SA nie. Kry ‘n gevoel dat die enjins nie vir ‘n lang lewe gebou word nie. Sal maar hou by my gewone enjins.
Wat my verbaas is hoe Mercedes in die laaste 10 jaar enjins se kraglewering meer as verdubbel het. 10 tot 15 jaar terug het VW ‘n 1400 enjin gemaak wat 125kw gelewer het, en dit was ongelooflik. Dit was egter ‘n prototipe. Nou doen Merc dit op produksie vlak.