VW se laaste spesiale GTI binnekort in SA

Die Volkswagen Golf GTI TCR. Foto: Verskaf

Volkswagen het ʼn ryk geskiedenis met beperkte weergawe- GTI’s.

Die eerste was die Golf VI GTI Edition 35, toe die Clubsport en Clubsport S. Dis die eerste keer wat ons gesien het waartoe ʼn GTI regtig in staat is.

Golf 7.5 is op die einde van sy lewensiklus … en dis tyd vir die finale: die Volkswagen Golf GTI TCR. Suid-Afrika is die tiende grootste GTI-mark ter wêreld. Daar is al 40 128 Golf 7’s in Suid-Afrika verkoop – en 33% (13 230) is GTI’s. Dis indrukwekkend. ʼn GTI het al ʼn instelling geword in Suid-Afrika. Wat die GTI bied, vir die geld, het dit ʼn huishoudelike handelsmerk gemaak.

Die Volkswagen Golf GTI TCR. Foto: Verskaf

Die TCR draai wel die volume tot die maksimum. Die nuwe TCR maak gebruik van VW se puik 2.0 viersilinderturbo-petrolenjin wat 213 kW en 380 Nm bied. Krag word na die voorwiele gestoot deur ʼn 6-spoed DSG-dubbelkoppelaarratkas. 0 – 100 km/h neem ʼn ratse 5,6 sekondes, verstommend vir ʼn voorwielaangedrewe voertuig, en hy sal aanhou hardloop tot 264 km/h.

Daar kom slegs 300 TCR’s na Suid-Afrika. Hulle is in drie kleure, Pure White; Tornado Red en Pure Grey beskikbaar. Suid-Afrika se TCR’s is slegs in vierdeur-bakstyl beskikbaar, en met die DSG-ratkas.

Die Volkswagen Golf GTI TCR. Foto: Verskaf

Die TCR kry unieke visuele opknappings om hom van sy boeties te onderskei. Die TCR kry swart 19” Reifnitz-sierwiele, geperforeerde remskywe, matswart spieëltjies sowel as ʼn paar vinne en vlerke. Agter die stuur word die sportsitplekke met Alcantara-leer oorgetrek, en dan is daar die gewone magdom veiligheidstelsels en luukshede soos luimbeligting, navigasie, klimaatbeheer en so meer.

Ons sal wel ná die inperking ʼn beurt kry om met die GTI TCR te ry. Ek persoonlik sou teen die prys eerder ʼn Golf R vat met sy vierwielaandrywing, maar daar is baie wat die hantering van die voorwielaangedrewe GTI verkies. Die voordeel is dat beperkte weergawe GTI’s altyd puik presteer. Vir ʼn tyd ná bekendstelling verkoop van hulle ver bó hul aanvanklike koopprys.

Die GTI lyk só:

Die reeks word gedek deur ʼn 3 jaar/ 120 000 km waarborg en 5 jaar/ 90 000 km diensplan.

Kliek hier om jou eie TCR te laat  bou en te bestel.