Nasa se New Horizons-tuig wat op 14 Julie vanjaar net 12 500 km van Pluto af verby gaan haas, kon vir die eerste keer Pluto saam met sy vyf mane gefotografeer kry.
Veral twee van die mane, Kerberos (7 – 21 km in deursnee) en Stix (10 – 32 km in deursnee) is baie klein en dit word as wonder beskryf dat die New Horizons met sy LORRI-langafstandkamera hulle sigbaar gefotografeer kon kry. Hulle is maar onlangs eers deur die Hubble-teleskoop ontdek, lank ná New Horizons in Januarie 2006 gelanseer is.
Op die beeld versmelt die grootste maan, Charon, met Pluto. Die ander twee mane heet Hydra, Nix.
New Horizons sal nou begin om die ruimte rondom Pluto vir nog moontlike maantjies of ander voorwerpe te verken – ook vir die tuig se eie veiligheid met sy verbyvlug.
New Horizons het onlangs vir die eerste keer foto’s geneem waarop oppervlak-eienskappe van Pluto gesien kan word. Tot dusver was die mensdom vir die beste beelde van Hubble verantwoordelik, wat Pluto egter net as ’n uit fokus kolletjie kan wys.
Bron: CS Monitor